Toshkentda ko‘cha sirk san’ati bo‘yicha “Ochiq osmon ostida sirk. Yevropa sirk maktablari mutaxassislari O‘zbekistonda” deb nomlangan hamkorlikdagi loyiha doirasida Sirk.uz tomoshalari bo‘lib o‘tdi, deya xabar bermoqda “UZ24”. Akrobatlar hamda dorbozlarning tomoshasi 21-may kuni Toshkent davlat sirki binosi oldidagi maydonda o‘tkazildi.
Tomoshani O‘zbekiston sport va madaniyat ishlari vaziri Fotih Jalolov, Fransiyaning O‘zbekistondagi elchisi Jak-Anri Els va Germaniya elchisi Naytxart Xyofer-Vissinglar ochib berdi.
Ko‘p sonli tomoshabinlarning olqishlari ostida Fransiyadan (Xloye Mura, Marion Kolle va Matyo Ibon) va Germaniyadan (Kira Paas va Anders Yensen) kelgan ustalar hamda Toshkent sirki ustalari o‘z hunarlarini ko‘rsatdi.
Eslatib o‘tamiz, Sirk.uz nomi ostida katta tomoshalar 23-may soat 18.00 da Farg‘onadagi “Kimyogar” madaniyat va istirohat bog‘ida, 24-may kuni soat 18.00 da Andijon shahridagi Alisher Navoiy nomidagi madaniyat va istirohat bog‘ida ham davom etadi.
Izoh (0)