Biometrik pasportni 100 dollar evaziga vaqtli tayyorlab berishini aytgan pasport bo‘limi boshlig‘ining qilmishi ochildi

Ma’lumki, ayni vaqtda yurtimizda fuqarolar pasportlarini biometrik pasportga almashtirmoqda. Angrenlik fuqaro 2014-yilning iyul oyida fuqarolik pasportini almashtirish uchun Angren shahriga qarashli Krasnogorsk shaharchasining pasport bo‘limiga keladi, deb xabar qiladi “Huquq” gazetasi.

Unga biometrik pasport juda zarur bo‘lgani bois ishni tezda amalga oshirish uchun bo‘limning mutasaddi xodimlariga murojaat qiladi. Pasport bo‘limi boshlig‘i esa bu ishdan o‘z manfaati yo‘lida foydalanib qolmoqchi bo‘ldi.

Boshliq avvaliga fuqaroga hujjatlar tayyor bo‘lishiga biroz vaqt kerak bo‘lishini aytib, uning hafsalarini pir qiladi. Ammo boshliq “xizmat haqi” uzatsa, aytgan vaqtida biometrik pasport tayyor bo‘lishini aytadi va qog‘ozga 100 AQSh dollarini yozib, unga ko‘rsatadi.

Pasport bo‘limi boshlig‘ining huzuridan chiqqan fuqaro uning tamagirlik qilayotganini tushunib yetadi va kerakli joyga ariza bilan murojaat qiladi. Uning arizasi asosida o‘tkazilgan tadbirda boshliq o‘z xizmat xonasida 100 AQSh dollarini pora tariqasida olayotgan vaqtda huquqni muhofaza qiluvchi organlar xodimlari tomonidan qo‘lga olindi.

Jinoyat ishlari bo‘yicha Angren shahar sudi vazifasini suiiste’mol qilgan rahbarning qilmishiga yarasha jazo tayinlab, hukm chiqardi.