Маълумки, айни вақтда юртимизда фуқаролар паспортларини биометрик паспортга алмаштирмоқда. Ангренлик фуқаро 2014 йилнинг июль ойида фуқаролик паспортини алмаштириш учун Ангрен шаҳрига қарашли Красногорск шаҳарчасининг паспорт бўлимига келади, деб хабар қилади «Ҳуқуқ» газетаси.
Унга биометрик паспорт жуда зарур бўлгани боис ишни тезда амалга ошириш учун бўлимнинг мутасадди ходимларига мурожаат қилади. Паспорт бўлими бошлиғи эса бу ишдан ўз манфаати йўлида фойдаланиб қолмоқчи бўлди.
Бошлиқ аввалига фуқарога ҳужжатлар тайёр бўлишига бироз вақт керак бўлишини айтиб, унинг ҳафсаларини пир қилади. Аммо бошлиқ «хизмат ҳақи» узатса, айтган вақтида биометрик паспорт тайёр бўлишини айтади ва қоғозга 100 АҚШ долларини ёзиб, унга кўрсатади.
Паспорт бўлими бошлиғининг ҳузуридан чиққан фуқаро унинг тамагирлик қилаётганини тушуниб етади ва керакли жойга ариза билан мурожаат қилади. Унинг аризаси асосида ўтказилган тадбирда бошлиқ ўз хизмат хонасида 100 АҚШ долларини пора тариқасида олаётган вақтда ҳуқуқни муҳофаза қилувчи органлар ходимлари томонидан қўлга олинди.
Жиноят ишлари бўйича Ангрен шаҳар суди вазифасини суиистеъмол қилган раҳбарнинг қилмишига яраша жазо тайинлаб, ҳукм чиқарди.
Изоҳ (0)