Nokia mobil telefonlari uchun “Ilon yo‘li” o‘yinini ishlab chiqqan mutaxassislar afsonaviy o‘yinning smartfonlar uchun mo‘ljallangan davomini tayyorlashdi. N+1’ning xabar berishicha, ilova-dasturni Google Play, App Store va Windows Phone Store’dan yuklab olish mumkin.
1997-yili Nokia telefonlari uchun original “ilon yo‘li”ni tayyorlagan Taneli Armanto afsonaviy o‘yinning smartfonlar uchun mo‘ljallangan sikvelini chiqardi.
Snake Rewind nomini olgan o‘yinning geympleyi ham yangilangan: endi ilon o‘yin jarayonini osonlashtiradigan turli bonus-mevalarni to‘plashi, o‘yinchi esa har bir bosqichda turli vazifalarni bajarishi mumkin.
Shuningdek, o‘yinga oid turli buyumlarni sotib olish imkoniyati ham qo‘shilgan. O‘yin jarayonining original “ilon yo‘li”dan eng asosiy farqi – o‘yinchi yutqazib qo‘ysa, o‘yinni “boshiga qaytarib”, qayta boshlashi mumkin.
https://youtu.be/5i-Lvla_wt8
“Ilon yo‘li” o‘yiniga oid ilk ma’lumotlar 1970-yillarning o‘rtalariga borib taqaladi. O‘yin jarayoni juda oddiy: o‘yinchi imkon qadar ko‘proq buyum yeyishga urinib, shuning hisobidan uzunlashib ketaveradigan ilonni boshqaradi.
O‘yin murakkabligi o‘yin qahramonining tezligi va uzunligi muttasil o‘sib borishi bilan bog‘liq. Ilon faqat to‘g‘ri burchak bo‘ylab burila oladi, ayni vaqtda, o‘yinchi ilonning harakatini to‘xtata olmaydi.
Izoh (0)