Nokia мобил телефонлари учун «Илон йўли» ўйинини ишлаб чиққан мутахассислар афсонавий ўйиннинг смартфонлар учун мўлжалланган давомини тайёрлашди. N+1’нинг хабар беришича, илова-дастурни Google Play, App Store ва Windows Phone Store’дан юклаб олиш мумкин.
1997 йили Nokia телефонлари учун оригинал «илон йўли»ни тайёрлаган Танели Арманто афсонавий ўйиннинг смартфонлар учун мўлжалланган сиквелини чиқарди.
Snake Rewind номини олган ўйиннинг геймплейи ҳам янгиланган: энди илон ўйин жараёнини осонлаштирадиган турли бонус-меваларни тўплаши, ўйинчи эса ҳар бир босқичда турли вазифаларни бажариши мумкин.
Шунингдек, ўйинга оид турли буюмларни сотиб олиш имконияти ҳам қўшилган. Ўйин жараёнининг оригинал «илон йўли»дан энг асосий фарқи – ўйинчи ютқазиб қўйса, ўйинни «бошига қайтариб», қайта бошлаши мумкин.
https://youtu.be/5i-Lvla_wt8
«Илон йўли» ўйинига оид илк маълумотлар 1970 йилларнинг ўрталарига бориб тақалади. Ўйин жараёни жуда оддий: ўйинчи имкон қадар кўпроқ буюм ейишга уриниб, шунинг ҳисобидан узунлашиб кетаверадиган илонни бошқаради.
Ўйин мураккаблиги ўйин қаҳрамонининг тезлиги ва узунлиги муттасил ўсиб бориши билан боғлиқ. Илон фақат тўғри бурчак бўйлаб бурила олади, айни вақтда, ўйинчи илоннинг ҳаракатини тўхтата олмайди.
Изоҳ (0)