АҚШ Конгрессининг Вакиллар палатаси Миллий хавфсизлик агентлиги (МХА)нинг телефон қўнғироқлари билан боғлиқ мета-маълумотларни оммавий тўплаш имкониятини чекловчи қонун лойиҳасини маъқуллади. Бу ҳақда Meduza.io хабар бермоқда.
«АҚШ эркинлиги тўғрисидаги қонун» лойиҳаси АҚШ Конгресси юқори палатасида тингловдан ўтиши керак. The Washington Post’нинг ёзишича, ушбу ҳужжатнинг сенат томонидан қабул қилиниши истиқболи аниқ-тиниқ эмас.
Нашрнинг қайд этишича, махсус хизматларнинг қонуний асосларини кескин қайта шакллантиришга кўплаб сенаторлар қарши чиқишмоқда.
Қонун лойиҳасида қайд этилишича, МХА қўнғироқлар ҳақидаги маълумотларни фақат суд қарори билан олиши мумкин, телекоммуникация компанияларига эса махсус хизматларнинг бундай сўровлари ҳақида оммага маълум қилиш ҳуқуқи берилади.
МХА америкаликларнинг телефон қўнғироқлари ҳақидаги мета-маълумотлар (абонентларнинг рақами, сўзлашувнинг санаси ва давомйлиги)ни тўплаш учун махсус дастур ишлаб чиққанини 2013 йилда АҚШ махсус хизматларининг собиқ ходими Эдвард Сноуден маълум қилганди. Бундай ахборотларни тўплаш учун МХАга суд қарори зарур бўлмаган.
Изоҳ (0)