Joriy yilning 8—11-may kunlari Qatar poytaxti Doha shahrida 1998—1999-yillarda tug‘ilgan sportchilar o‘rtasida yengil atletika bo‘yicha Osiyo chempionati bo‘lib o‘tdi. Bu haqda O‘zbekiston milliy olimpiya qo‘mitasi matbuot xizmati xabar berdi.
Qit’aning yetakchi atletlari ishtirokida o‘tkazilgan mazkur nufuzli musobaqada O‘zbekiston vakillari 2 ta oltin va 2 ta bronza medaliga sazovor bo‘ldi.
O‘zbekiston terma jamoasi hisobiga oltin medallarni Safina Sa’dullayeva (balandlikka sakrash, 1,71 m) hamda Vladislav Polyunin (nayza uloqtirish, 79,11 m) keltirgan bo‘lsa, yettikurash bahslarida ishtirok etgan Aleksandra Yurkevskaya (4629 ochko) va uch hatlab sakrashda Viktoriya Dirdina (12,34 m) bronza medallarini qo‘lga kiritdi.
Shu o‘rinda ta’kidlash joizki, Osiyo chempionatida ishtirok etgan ko‘plab o‘zbekistonlik sportchilar to‘rtinchi va beshinchi o‘rinlar bilan kifoyalanishga majbur bo‘ldi. Garchi ular ham o‘z oldilariga sovrinli o‘rinlarni egallashni maqsad qilgan bo‘lsada, hal qiluvchi pallada omad, ba’zan esa tajriba yetishmadi.
O‘ta murosasiz o‘tgan musobaqalar yakunlariga ko‘ra, 2 ta oltin va 2 ta bronza medaliga egalik qilgan O‘zbekiston terma jamoasi 24 davlat vakillari orasida kuchli oltilikka kirdi.
Izoh (0)