Жорий йилнинг 8—11 май кунлари Қатар пойтахти Доҳа шаҳрида 1998—1999 йилларда туғилган спортчилар ўртасида енгил атлетика бўйича Осиё чемпионати бўлиб ўтди. Бу ҳақда Ўзбекистон миллий олимпия қўмитаси матбуот хизмати хабар берди.
Қитъанинг етакчи атлетлари иштирокида ўтказилган мазкур нуфузли мусобақада Ўзбекистон вакиллари 2 та олтин ва 2 та бронза медалига сазовор бўлди.
Ўзбекистон терма жамоаси ҳисобига олтин медалларни Сафина Саъдуллаева (баландликка сакраш, 1,71 м) ҳамда Владислав Полюнин (найза улоқтириш, 79,11 м) келтирган бўлса, еттикураш баҳсларида иштирок этган Александра Юркевская (4629 очко) ва уч ҳатлаб сакрашда Виктория Дирдина (12,34 м) бронза медалларини қўлга киритди.
Шу ўринда таъкидлаш жоизки, Осиё чемпионатида иштирок этган кўплаб ўзбекистонлик спортчилар тўртинчи ва бешинчи ўринлар билан кифояланишга мажбур бўлди. Гарчи улар ҳам ўз олдиларига совринли ўринларни эгаллашни мақсад қилган бўлсада, ҳал қилувчи паллада омад, баъзан эса тажриба етишмади.
Ўта муросасиз ўтган мусобақалар якунларига кўра, 2 та олтин ва 2 та бронза медалига эгалик қилган Ўзбекистон терма жамоаси 24 давлат вакиллари орасида кучли олтиликка кирди.
Изоҳ (0)