Google’ning haydovchisiz avtomobillar dasturi olti yil davomida 11 marta yo‘l-transport hodisalariga uchradi. Bu haqda, Slon.ru’ning xabar berishicha, dastur direktori Kris Urmson ma’lum qildi.
Yetti holatda haydovchisiz avtomobilni orqadan kelib urishgan (bu holatlar yo svetoforli chorraha yoki tezyurar shosseda sodir bo‘lgan), avariyalarning sakkiztasi esa shahar atrofida yuz bergan.
Dasturda 20dan ortiq haydovchisiz avtomobil qatnashayotgan bo‘lib, ular jami 1,6 million kilometr yo‘l bosgan. Bir hafta davomida bu avtomobillar 16 ming kilometr masofada harakatlanadi – Urmsonning ta’kidlashicha, amerikalik o‘rtacha haydovchi bir yilda xuddi shuncha yo‘l yuradi.
Urmson keltirgan ma’lumotlarga ko‘ra, har yili AQSHda 33 mingga yaqin kishi YTHlar sabab halok bo‘ladi, ushbu holatlarning 94 foizida haydovchilar aybdor bo‘ladi. Bundan tashqari, AQSH rasmiy ma’lumotlariga ko‘ra, 2013-yili 3 mingdan ortiq kishi haydovchilarning mobil qurilmalarga chalg‘ib qolgani ortidan avtomobil ostida qolib, halok bo‘lgan. AQSHdagi haydovchilarning 660 mingdan ortig‘i haydash vaqtida mobil qurilmalardan foydalanadi.
Urmsonning qayd etishicha, haydovchisiz avtomobillarda bunday nuqsonlar yo‘q. Bundan tashqari, kompyuter orqali boshqariladigan bu mashinalar avariyalar eng ko‘p sodir bo‘ladigan joylar – chorrahalar va burilishlarda ham qiyinchilik his qilmaydi.
Tesla Motors va SpaceX kompaniyalari rahbari Elon Mask 2015-yil martidagi ma’ruzasida kelajakda avtomobillarning tirik odamlar tomonidan boshqarilishi taqiqlab qo‘yilishi mumkinligi haqida aytib o‘tgandi. Uning fikricha, taxminan keyingi 20 yil davomida avtomobilsozlik sanoati haydovchisiz mashinalar ishlab chiqarishga to‘liq o‘tishi mumkin.
Izoh (0)