Google’нинг ҳайдовчисиз автомобиллар дастури олти йил давомида 11 марта йўл-транспорт ҳодисаларига учради. Бу ҳақда, Slon.ru’нинг хабар беришича, дастур директори Крис Урмсон маълум қилди.
Етти ҳолатда ҳайдовчисиз автомобилни орқадан келиб уришган (бу ҳолатлар ё светофорли чорраҳа ёки тезюрар шосседа содир бўлган), аварияларнинг саккизтаси эса шаҳар атрофида юз берган.
Дастурда 20дан ортиқ ҳайдовчисиз автомобиль қатнашаётган бўлиб, улар жами 1,6 миллион километр йўл босган. Бир ҳафта давомида бу автомобиллар 16 минг километр масофада ҳаракатланади – Урмсоннинг таъкидлашича, америкалик ўртача ҳайдовчи бир йилда худди шунча йўл юради.
Урмсон келтирган маълумотларга кўра, ҳар йили АҚШда 33 мингга яқин киши ЙТҲлар сабаб ҳалок бўлади, ушбу ҳолатларнинг 94 фоизида ҳайдовчилар айбдор бўлади. Бундан ташқари, АҚШ расмий маълумотларига кўра, 2013 йили 3 мингдан ортиқ киши ҳайдовчиларнинг мобил қурилмаларга чалғиб қолгани ортидан автомобиль остида қолиб, ҳалок бўлган. АҚШдаги ҳайдовчиларнинг 660 мингдан ортиғи ҳайдаш вақтида мобил қурилмалардан фойдаланади.
Урмсоннинг қайд этишича, ҳайдовчисиз автомобилларда бундай нуқсонлар йўқ. Бундан ташқари, компьютер орқали бошқариладиган бу машиналар авариялар энг кўп содир бўладиган жойлар – чорраҳалар ва бурилишларда ҳам қийинчилик ҳис қилмайди.
Tesla Motors ва SpaceX компаниялари раҳбари Элон Маск 2015 йил мартидаги маърузасида келажакда автомобилларнинг тирик одамлар томонидан бошқарилиши тақиқлаб қўйилиши мумкинлиги ҳақида айтиб ўтганди. Унинг фикрича, тахминан кейинги 20 йил давомида автомобилсозлик саноати ҳайдовчисиз машиналар ишлаб чиқаришга тўлиқ ўтиши мумкин.
Изоҳ (0)