“Qo‘qon — Namangan — Andijon” yo‘nalishidagi shaharlararo yo‘lovchi poyezdi Namangandan yo‘lga tushib, Chortoqqa yaqinlashganida teplovoz haydovchisi I. Soliyev ro‘paradagi temir yo‘l izlari ustida nimalardir borligini payqadi, deb yozadi “Postda” gazetasi. U poyezdni tezda to‘xtatish chorasini ko‘rdi.
150—200 metr narida temir yo‘l relslari ustida betondan tayyorlangan oltita piket ustun, ikkita signal va kilometr ko‘rsatkichi yozilgan beton yotardi. Xabar zudlik bilan ichki ishlar idoralari xodimlariga yetkazildi. Ular voqea joyiga yetib kelib, yaqin atrofda surishtiruv o‘tkazdi.
Ushbu qilmish Chortoqdagi maishiy xizmat kasb-hunar kolleji o‘quvchilari — Q. Botir, M. A’zam va H. Mirzohid tomonidan amalga oshirilgani aniqlandi.
Jinoyat ishlari bo‘yicha Chortoq tuman sudida voyaga yetmaganlarning qilmishi muhokama qilindi va tegishli jazo tayinlandi.
Izoh (0)