O‘zbekistonda nogironlar uchun mo‘ljallangan zamonaviy anjomlar ularning talab va istaklariga ko‘ra ishlab chiqariladi

Nogironlar haq-huquqlari bo‘yicha konvensiya ishlab chiqarishga “ommabop dizayn” degan tushunchani olib kirdi. Bu tushuncha har qanday uskunadan ham oddiy odamlar, ham alohida ehtiyoji bo‘lgan odamlar birday, bemalol qo‘llana olishi talabi qo‘yildi. Yurtimizda “ommabop dizayn” masalasiga ham, nogironlar uchun maxsus anjomlar ishlab chiqarish masalasiga ham katta e’tibor qaratilmoqda, deb yozadi O‘zbekiston Respublikasi Mehnat va aholini ijtimoiy muhofaza qilish vazirligi axborot xizmati.

Mehnat va aholini ijtimoiy muhofaza qilish vazirligi va BMT Taraqqiyot dasturi tomonidan nogironlarning sifatli va nisbatan arzon reabilititsion texnikalarga bo‘lgan ehtiyojini qondirish masalasi o‘rganib chiqildi va ba’zi zamonaviy anjomlarning namunalari sotib olindi. Avtomobil ehtiyot qismlari, velosiped va mototexnika ishlab chiqaruvchi korxonalarning, reabilitatsiya anjomlarni ishlab chiqarishga bo‘lgan salohiyatiga mo‘ljallangan maxsus seminar ham o‘tkazildi. Tadbirda ularga zamonaviy reabilitatsiya texnikalari va ularning texnik hujjatlari tanishtirildi. Seminarda nogironlar ham ishtirok etdi va maxsus anjomlarni ishlab chiqarishda yana nimalarga e’tibor qaratish lozimligi haqida o‘z fikrlarini bildirdi. Ishlab chiqaruvchilar namoyish etilgan namunalar va texnik hujjatlardan kelib chiqib, nogironlar aravachalari, yurish moslamalari va boshqa reabitatsiya vositalarining namunalarini yaratish ustida ish boshladi.

Ikki oy o‘tar-o‘tmas, ishlab chiqaruvchilar vazirlikka mahsulotlarning ilk loyihalarini taqdim etdi. Mehnat va aholini ijtimoiy muhofaza qilish vazirligi va BMT Taraqqiyot dasturining “O‘zbekistonda nogironlar va yolg‘iz keksalarga professional ijtimoiy xizmat ko‘rsatish” loyihasi mutaxassislari ishlab chiqaruvchilar, nogironlar masalalari bo‘yicha mutaxassislar va nogironlar o‘rtasida uchrashuv tashkil etdi.

Nogironlarning ehtiyojlarini yaxshi anglagan holda, mahsulotlarning prototip nusxalariga baho berildi va ularni yanada mukammallashtirish bo‘yicha tegishli tavsiyalar aytib o‘tildi. Yangi mahsulotlarning bu qadar puxta va bamaslahat ishlab chiqarilishidan kelib chiqib, Made in Uzbekistan brendi ostida taqdim etiladigan ushbu reabilitatsiya anjomlari ham sifat jihatidan, ham narx-navosi jihatidan ancha talabchil va nogironlarning koriga yarovchi mahsulot bo‘lishi shubhasiz. Ishlab chiqarish yangi ish o‘rinlari yaratish uchun ham xizmat qilishini unutmaslik kerak. Bu tadbirlarning barchasi “Keksalarni qadrlash va e’zozlash yili” Davlat dasturi doirasida amalga oshiriladi.