Ҳиндистонда маочиларнинг қуролланган гуруҳи 500га яқин кишини гаровга олди. RBC.ru’нинг хабар беришича, гаровга олинганлар мамлакат бош вазири Нарендра Моди билан учрашувга кетаётган бўлишган.
Ҳодиса Ҳиндистоннниг марказий қисмидаги Чхаттисгарҳ штати Сукма туманидаги Маренга қишлоғида рўй берган. Дастлабки маълумотларга кўра, қишлоқ аҳолиси Дантевададаги мамлакат бош вазири Нарендра Моди билан бўладиган учрашувга кетаётган бўлган.
India TV телеканалининг қайд этишича, ҳукумат бошлиғи келиши арафасида Дантевада «қалъага айлантирилган». Маочи исёнчиларга қарши кураш мақсадида тузилган CoBRA (Commando Batallion for Resolute Action) батальонининг 200 нафар жангчисидан ташқари учрашув бўладиган туманга миллий хавфсизлик хизмати ва ҳарбийлаштирилган бўлинмаларнинг 15 мингга яқин ходими киритилган.
Ҳукумат амалдорларининг маълум қилишича, Нарендра Моди учрашув чоғида округдаги йирик металлургия заводи қурилиши ва йирик темирйўл тармоғи қурилишининг иккинчи босқичи бошланишини эълон қилади. Бундан ташқари, бош вазир кам таъминланган оилаларнинг фарзандлари учун мўлжалланган таълим шаҳарчасига ташриф буюришни ҳам режалаштирган эди.
NDTV телеканали маълумотига кўра, маочилар Маренга аҳолисини Моди билан учрашувга бормасликка кўндиришга уринишган. Ўтган жума куни улар дарахтни қўпориб, қишлоққа олиб борувчи йўлни тўсиб қўйишганди, йўлга ҳукуматга қарши шиорлар, Нарендра Моди ва Раман Сингҳнинг тулумлари осиб қўйилган.
Маҳаллий амалдорларнинг телеканалга маълум қилишларича, маочилар қўшни кўприк қурилишида банд бўлган бир гуруҳ маренгалик ишчиларни ҳам гаровга олишган. Орадан кўп ўтмай жангарилар ишчиларни озод қилиш бўйича музокара ўтказгани келган фуқароларни ҳам қўлга олишган.
Ҳиндистон шарқидаги Ғарбий Бенгалия штатидаги маочилар исёни 1960 йилларнинг охирида бошланган бўлиб, улар Ҳиндистонда коммунистик тартиб ўрнатилиши, шунингдек, қабилаларнинг ҳуқуқлари кенгайтирилиши учун ва қишлоқдаги қашшоқликка қарши кураш олиб боришади. Вақти-вақти билан маочилар одамларни гаровга олишади, полициячилар ва давлат амалдорларига ҳужум қилишади. Хусусан, 2014 йил охирида Сукма округида маочилар томонидан камида 13 нафар полициячи ўлдирилган эди.
Изоҳ (0)