Saudiya Arabistoni qiroli Salmon bin Abdul Aziz as-Saud Yamanga gumanitar yordam berish markazini ochmoqchi ekanligini ma’lum qildi, deb xabar beradi “TASS”.
Qirol o‘zining bu niyatini Fors ko‘rgazidagi arab davlatlari hamkorligi kengashi tarkibiga kiruvchi mamlakat rahbarlari bilan o‘tkazilgan uchrashuv vaqtida aytdi. Salmon bin Abdul Aziz as-Saud bu tashabbusni BMT va mintaqadagi boshqa davlatlar qo‘llab-quvvatlashiga umid qildi.
Yaman hukumati va xusiylar o‘rtasidagi nizolar 2014-yilning avgustida boshlangandi. Joriy yilning yanvar oyida qo‘zg‘olonchilar mamlakat poytaxti Sanani to‘liq qo‘lga oldi. Yaman prezidenti Abdu Rabbo Mansur Hodiy oldiniga Adanga qochib o‘tdi, 25-mart kuni xusiylar bu shaharga ham kirganlaridan so‘ng u mamlakatni tark etdi. Bungacha u Fors ko‘rgazi davlatlariga murojaat qilib, ularni vaziyatga aralashishga chaqirdi.
Saudiya Arabistoni boshchiligidagi koalitsiya 26-martdan 21-aprelga qadar “Jasorat bo‘roni” operatsiyasini o‘tkazdi. Endi “Umidning tiklanishi” yangi operatsiyasi boshlandi.
Eslatib o’tamiz, Butunjahon sog‘liqni saqlash tashkiloti ma’lumotlariga ko‘ra, aprel oyi oxirigacha Yamanda 1244 kishi halok bo‘ldi va 5044 kishi yaralandi. 334 mingdan ortiq kishi evakuatsiya qilindi, 254 mingdan ortiq odam qochoqqa aylandi.
Izoh (0)