Саудия Арабистони қироли Салмон бин Абдул Азиз ас-Сауд Яманга гуманитар ёрдам бериш марказини очмоқчи эканлигини маълум қилди, деб хабар беради ТАСС.
Қирол ўзининг бу ниятини Форс кўргазидаги араб давлатлари ҳамкорлиги кенгаши таркибига кирувчи мамлакат раҳбарлари билан ўтказилган учрашув вақтида айтди. Салмон бин Абдул Азиз ас-Сауд бу ташаббусни БМТ ва минтақадаги бошқа давлатлар қўллаб-қувватлашига умид қилди.
Яман ҳукумати ва хусийлар ўртасидаги низолар 2014 йилнинг августида бошланганди. Жорий йилнинг январь ойида қўзғолончилар мамлакат пойтахти Санани тўлиқ қўлга олди. Яман президенти Абду Раббо Мансур Ҳодий олдинига Аданга қочиб ўтди, 25 март куни хусийлар бу шаҳарга ҳам кирганларидан сўнг у мамлакатни тарк этди. Бунгача у Форс кўргази давлатларига мурожаат қилиб, уларни вазиятга аралашишга чақирди.
Саудия Арабистони бошчилигидаги коалиция 26 мартдан 21 апрелга қадар «Жасорат бўрони» операциясини ўтказди. Энди «Умиднинг тикланиши» янги операцияси бошланди.
Эслатиб ўтамиз, Бутунжаҳон соғлиқни сақлаш ташкилоти маълумотларига кўра, апрель ойи охиригача Яманда 1244 киши ҳалок бўлди ва 5044 киши яраланди. 334 мингдан ортиқ киши эвакуация қилинди, 254 мингдан ортиқ одам қочоққа айланди.
Изоҳ (0)