«Ўзбекистоннинг етти мўъжизаси» акцияси тақдимоти бўлиб ўтди

Тошкентдаги Алоқа тарихи музейида 6 май куни «Ўзбекистоннинг етти мўъжизаси» лойиҳаси тақдимоти бўлиб ўтди. Бу ҳақда Blog.index.uz хабар бермоқда.

Тадбир ташкилотчиларидан бири – UZINFOCOM маркази директори вазифасини бажарувчи Ғайратхўжа Сайдалиев акциянинг Ўзбекистон ва ҳар бир ўзбекистонлик учун, мамлакатнинг туристик мафтункорлиги ва халқаро нуфузи учун аҳамияти ҳақида сўзлади.

Акция ташаббускори, ZiyoNET маркази ходими Зумрад Шожалилова эса тадбирнинг техник томони, акциянинг ҳар бир босқичи, номзодлар қандай илгари сурилиши, қандай бўлимлари бўлиши ҳақида маълумот берди, ҳудудлар ва Ўзбекистон бўйича ғолиблар қандай аниқланишини тушунтирди.

Тақдимотда қатнашган журналистлар ва блогерлардан ҳам бир қатор қизиқарли таклифлар тушди. Хусусан, Борис Бабаев Маданият ва спорт ишлари вазирлигидан тарихий объектлари ҳақидаги маълумотларни олиб, ҳар бир номзод объект ҳақида расмий ахборот беришни таклиф қилди.

Маданият ва спорт ишлари вазирлигининг собиқ раҳбари Турсунали Қўзиев эса жорий акцияда асосий эътиборни архитектура ва табиат ёдгорликларига қаратиб, номинациялар кўламини нисбатан чеклашни, қадриятлар, амалий санъат ва номоддий меросни бошқа шу каби акциялар учун сақлаб қўйишни тавсия қилди.

Блогер Бахтиёр Насимов эса Ўзбекистоннинг кулинария шедеврларини ҳам мўъжизалар қаторига киритиш таклифини илгари сурди. Раҳимжон Султонов ҳам унинг фикрини қўллаб-қувватлаб, бутун дунё паловни айнан Ўзбекистон билан боғлашини айтди.

Табиатни муҳофаза қилиш давлат қўмитаси вакили Виктория Ризаева эса табиат мўъжизаларига кўпроқ эътибор қаратишга чақирди, чунки, унинг фикрича, улар архитектура ёдгорликлари каби муҳофазага муҳтождир.