Ўзбекистон вакиллари Буюк Британиядаги сайловларни кузатади

Ўзбекистон вакиллари Буюк Британиядаги умумий парламент сайловларини кузатиб борувчи миссияда иштирок этади. Бу ҳақда, Буюк Британиянинг Тошкентдаги элчихонаси матбуот хизматига асосланиб, «Газета.uz» хабар бермоқда.

Лондондан 27 километр узоқликда жойлашган Уотфорд шаҳар сайлов округидаги овоз бериш жараёнини Олий Мажлис Қонунчилик палатаси депутати, Халқаро ишлар ва парламентлараро алоқалар қўмитаси аъзоси Акмал Умирзоқов, шунингдек, Марказий сайлов комиссияси аъзоси, Ўзбекистон Миллий университети проректори, доктор Шуҳрат Сирожиддинов кузатиб боради.

Бир қатор мамлакатларнинг вакилларидан иборат кузатувчилар миссияси Миллатлар ҳамдўстлиги Парламент ассоциацияси (МҲПА)нинг Британия бўлими томонидан 2-8 май кунлари ташкил этилган. Ўзбекистон вакилларининг ташрифини ташкил этишга Буюк Британиянинг Тошкентдаги элчихонаси молиявий кўмак кўрсатган.

Миссия иштирокчилари тайёрлов машғулотларидан ўтишган ва 7 май куни овоз бериш жараёнини кузатиб боришади. Улар парламент аъзолигига кўрсатилган номзодлар, фуқаролик жамияти, маҳаллий маъмурият ва сайлов комиссияси вакиллари билан учрашишади. Хусусан, улар сайлов жараёнининг барча босқичларида, жумладан, сайлов участкаларининг очилиши, овоз беришнинг бориши, участкаларнинг ёпилиши ва овозларни ҳисоблашни кузатиб боришда ҳам иштирок этишади.