Toshkent viloyatining Bo‘stonliq tumanidagi “Allyur” ot sporti klubida Jahon kubogining Markaziy Osiyo ligasi I saralash bosqichi o‘tkazildi, deb xabar beradi Milliy Olimpiya qo‘mitasi matbuot xizmati.
Ma’lumki, Markaziy Osiyo ligasining saralash bosqich musobaqalari uch bosqichda o‘tkazilib, uning yakuniga ko‘ra eng yaxshi ko‘rsatkichga ega bo‘lgan chavandoz 2016-yili o‘tkaziladigan Jahon kubogining hal qiluvchi bosqichida qatnashish huquqini qo‘lga kiritadi.
O‘zbekistonda bo‘lib o‘tgan dastlabki saralash bosqichida g‘oliblikka hamyurtimiz Abdulaziz Mamatxonov Forjuliya laqabli otida erishdi. Tajribali chavandozimiz 140—160 sm balandlikdagi to‘siqlar osha sakrash musobaqalarida belgilangan masofani 77,42 soniyada (birorta jarima ochkolarisiz) bosib o‘tib, birinchi saralash bosqichining g‘olibligini qo‘lga kiritish bilan birga xalqaro toifadagi sport ustasi talabini ham bajardi.
Ikkinchi o‘rinni yana bir yurtdoshimiz Vladimir Shmelev egallagan bo‘lsa, uchinchi o‘rinni qirg‘izistonlik chavandoz Rinat Galimov band etdi.
Jahon kubogining Markaziy Osiyo ligasi ikkinchi saralash bosqichi joriy yilning 21—24-may kunlari Bishkek shahri (Qirg‘iziston)da o‘tkazilsa, hal qiluvchi uchinchi bosqich musobaqalari 1—5-iyul kunlari Qozog‘istonning Olma-ota shahrida bo‘lib o‘tadi.
Izoh (0)