Тошкент вилоятининг Бўстонлиқ туманидаги «Аллюр» от спорти клубида Жаҳон кубогининг Марказий Осиё лигаси I саралаш босқичи ўтказилди, деб хабар беради Миллий Олимпия қўмитаси матбуот хизмати.
Маълумки, Марказий Осиё лигасининг саралаш босқич мусобақалари уч босқичда ўтказилиб, унинг якунига кўра энг яхши кўрсаткичга эга бўлган чавандоз 2016 йили ўтказиладиган Жаҳон кубогининг ҳал қилувчи босқичида қатнашиш ҳуқуқини қўлга киритади.
Ўзбекистонда бўлиб ўтган дастлабки саралаш босқичида ғолибликка ҳамюртимиз Абдулазиз Маматхонов Форжулия лақабли отида эришди. Тажрибали чавандозимиз 140—160 см баландликдаги тўсиқлар оша сакраш мусобақаларида белгиланган масофани 77,42 сонияда (бирорта жарима очколарисиз) босиб ўтиб, биринчи саралаш босқичининг ғолиблигини қўлга киритиш билан бирга халқаро тоифадаги спорт устаси талабини ҳам бажарди.
Иккинчи ўринни яна бир юртдошимиз Владимир Шмелев эгаллаган бўлса, учинчи ўринни қирғизистонлик чавандоз Ринат Галимов банд этди.
Жаҳон кубогининг Марказий Осиё лигаси иккинчи саралаш босқичи жорий йилнинг 21—24 май кунлари Бишкек шаҳри (Қирғизистон)да ўтказилса, ҳал қилувчи учинчи босқич мусобақалари 1—5 июль кунлари Қозоғистоннинг Олма-ота шаҳрида бўлиб ўтади.
Изоҳ (0)