O‘zbekiston Respublikasi Xususiylashtirish, monopoliyadan chiqarish va raqobatni rivojlantirish davlat qo‘mitasiga UzPaynet MChJ QK tomonidan o‘z mavqeyini suiste’mol qilish holatlari to‘g‘risida bir qator tadbirkorlik subyektlari tomonidan murojaatlar kelib tushgan, deb yozadi Qo‘mita matbuot xizmati.
Ushbu murojaatlarga muvofiq Qo‘mita UzPaynet MChJ QK to‘lovchi agentlar bilan tuzadigan shartnomalari o‘rganib chiqildi va UzPaynet to‘lovchi agentlarga diskriminatsion shartlar belgilagani aniqlandi.
Natijada, UzPaynet MChJ QK tomonidan mazkur shartnoma qayta ko‘rib chiqildi, ma’lum shartlar qisqartirildi va bir xil shaklga keltirildi.
Masalan, UzPaynet MChJ QK tomonidan qo‘llaniladigan 16 turdagi jarima sanksiyalarini bir-biriga o‘xshashligi sababli 7 tasi qisqartirildi.
To‘lov qabul qilingandan so‘ng to‘lovchiga chek bermaslik uchun chora ko‘rish mavjudligini inobatga olgan holda, chek qog‘ozi yo‘qligi, kassa apparati yo‘qligi yoki ishlamasligi kabi qonunbuzarlik holatlari bir-birini qaytargani uchun shartnomadan chiqarib tashlandi. Shuningdek, to‘lov qabul qilishda yo‘l qo‘yilgan qonun buzilishi holatlari uchun xodimlarga qo‘llaniladigan choralar bir xil qilindi.
Xo‘jalik yurituvchi subyektning moliyaviy ahvoli yomonlashishiga yo‘l qo‘ymaslik maqsadida, shartnomada jarima hisoblashning ma’lum me’yori nazarda tutildi.
Izoh (0)