O‘zbekiston keyingi uch yil davomida “Hayraton – Mozori-Sharif” temir yo‘lidan foydalanish va unga xizmat ko‘rsatishda davom etadi. Bu haqda Vazirlar Mahkamasining Prezident Islom Karimov tomonidan imzolangan 14-apreldagi qarorida belgilab qo‘yilgan, deya xabar bermoqda Gazeta.uz.
Temir yo‘ldan foydalanishda davom etish to‘g‘risidagi “O‘zbekiston temir yo‘llari” DATK “O‘zbektemiryo‘lekspeditsiya” unitar korxonasining Sogdiana Trans sho‘ba korxonasi va Afg‘oniston jamoat ishlari vazirligi o‘rtasidagi shartnoma 2015-yil martida uzaytirilgan edi.
Hujjatga asosan, qancha yuk o‘tkazishidan qat’iy nazar, temir yo‘ldan foydalangani uchun O‘zbekiston tomoni Afg‘onistonga bir yilda 19 million dollar miqdorida pul to‘laydi.
Avvalgi uch yil davomida (2011-yil iyulida imzolangan shartnomaga muvofiq) O‘zbekiston kompaniyasi tomonidan “Hayraton – Mozori-Sharif” yo‘nalishi orqali 7,8 million tonna yuk tashildi.
Afg‘onistonning Mozori-Sharif shahrini O‘zbekiston chegarasi bilan bog‘lovchi 75 kilometrlik temir yo‘l 2010-yili ochilgan. Temir yo‘lni qurish bo‘yicha Afg‘oniston hukumati tenderida “O‘zbekiston temir yo‘llari” yutib chiqqan. Loyiha Osiyo Taraqqiyot bankining 165 million dollar hajmidagi granti hisobidan amalga oshirilgan.
Hukumat qarorida qayd etilishicha, yangi kelishuvlar Transafg‘on koridorini rivojlantirish, shuningdek, “Toshg‘uzor – Boysun – Qumqo‘rg‘on” temiryo‘li orqali tranzit tashuvlar hajmini oshirish va O‘zbekiston korxonalarining eksport salohiyatini kengaytirishga xizmat qiladi.
Izoh (0)