Vashingtonning Osiyodagi o‘z marralarini mustahkamlash, shuningdek, Xitoyning Janubiy Xitoy dengizidagi faolligiga munosabat bildirish maqsadida AQSH va Filippin birgalikda so‘nggi 15 yildagi eng yirik harbiy mashg‘ulotlarni boshlashdi. Bu haqda “TASS” xabar bermoqda.
2015-yilgi “Yelkama yelka” deb nom olgan mashg‘ulotlarda umumiy hisobda 11 mingdan ortiq askar ishtirok etmoqda. 10 kunlik mashg‘ulotlar davomida AQSH qiruvchi samolyotlarining aviazarbalari va quruqlikdagi haqiqiy jangovar harakatlar borasidagi ko‘nikmalar oshiriladi.
Xabar berishlaricha, AQSH keyingi besh yil davomida mintaqaning 12 turli mamlakati bilan birgalikda 29ta harbiy-o‘quv mashg‘ulotlarini o‘tkazishni rejalashtirgan.
Filippin Xitoyning Janubiy Xitoy dengizidagi faolligidan, xususan, dengizdagi bir qator orollarida qurilish ishlari olib borilayotganidan juda xavotirda.
Qayd etish joiz, Xitoy bir necha o‘n yillardan beri mintaqa mamlakatlari bilan Janubiy Xitoy dengizidagi bir qator orollar (masalan, Sisha arxipelagi, Nansha orollari va Xuanyan oroli) masalasida bahslashib keladi. Ushbu bahslarga Vyetnam, Bruney, Malayziya va Filippin u yoki bu darajada dahldordir.
O‘z navbatida, Xitoy tomoni 2015-yilning mart oyi boshida Janubiy Xitoy dengizidagi orollarda Xitoy tomonidan olib borilayotgan xo‘jalik ishlari “uchinchi mamlakatlarga qarshi qaratilmagani va ularga dahl qilmasligi” haqida bayonot bergandi.
Izoh (0)