Вашингтоннинг Осиёдаги ўз марраларини мустаҳкамлаш, шунингдек, Хитойнинг Жанубий Хитой денгизидаги фаоллигига муносабат билдириш мақсадида АҚШ ва Филиппин биргаликда сўнгги 15 йилдаги энг йирик ҳарбий машғулотларни бошлашди. Бу ҳақда ТАСС хабар бермоқда.
2015 йилги «Елкама елка» деб ном олган машғулотларда умумий ҳисобда 11 мингдан ортиқ аскар иштирок этмоқда. 10 кунлик машғулотлар давомида АҚШ қирувчи самолётларининг авиазарбалари ва қуруқликдаги ҳақиқий жанговар ҳаракатлар борасидаги кўникмалар оширилади.
Хабар беришларича, АҚШ кейинги беш йил давомида минтақанинг 12 турли мамлакати билан биргаликда 29та ҳарбий-ўқув машғулотларини ўтказишни режалаштирган.
Филиппин Хитойнинг Жанубий Хитой денгизидаги фаоллигидан, хусусан, денгиздаги бир қатор оролларида қурилиш ишлари олиб борилаётганидан жуда хавотирда.
Қайд этиш жоиз, Хитой бир неча ўн йиллардан бери минтақа мамлакатлари билан Жанубий Хитой денгизидаги бир қатор ороллар (масалан, Сиша архипелаги, Нанша ороллари ва Хуанян ороли) масаласида баҳслашиб келади. Ушбу баҳсларга Вьетнам, Бруней, Малайзия ва Филиппин у ёки бу даражада даҳлдордир.
Ўз навбатида, Хитой томони 2015 йилнинг март ойи бошида Жанубий Хитой денгизидаги оролларда Хитой томонидан олиб борилаётган хўжалик ишлари «учинчи мамлакатларга қарши қаратилмагани ва уларга даҳл қилмаслиги» ҳақида баёнот берганди.
Изоҳ (0)