G7 mamlakatlari tashqi ishlar vazirlari Rossiyaga qarshi sanksiyalar bekor qilinishi uchun shartlarni aytdi

Rossiyaga qarshi G‘arb sanksiyalari, Moskva fevralda Minskda imzolangan o‘t ochishni to‘xtatish to‘g‘risidagi bitimni bajarsa va Ukraina suverenitetini hurmat qilsagina, bekor qilinadi. Bu haqda G7 (AQSh, Germaniya, Fransiya, Italiya, Kanada, Buyuk Britaniya, Yaponiya) mamlakatlari tashqi ishlar vazirlari 15-aprel, chorshanba kuni Lyubek shahrida qabul qilgan birgalikdagi kommyunikeda aytiladi, deb yozadi “RBK”.

“Sanksiyalar birdan-bir maqsad emas: ularning davomiyligi Rossiya tomonidan Minsk kelishuvlari bajarilishi va Ukraina suverenitetining hurmat qilinishi bilan aniq bog‘liq bo‘lishi kerak”, — deya ta’kidladi tashqi siyosiy idoralar rahbarlari.

Vazirlar Ukraina va Rossiyaning o‘t ochishni to‘xtatish to‘g‘risidagi bitimni bajarishdagi ilk qadamlarini ma’qulladi. Ular, shuningdek Rossiya o‘zining rossiyaparast isyonchilarga bo‘lgan ta’siridan foydalanishi kerakligini qayd etdi.