Dmitriy Medvedevning matbuot kotibi Natalya Timakova bosh vazir va prezidentning deklaratsiya qilingan daromadlari o‘rtasidagi farqni tushuntirib berdi, deb yozadi “RBK”.
Uning aytishicha, Medvedev 2014-yilda mukofot pullari evaziga Vladimir Putindan ko‘proq pul ishlab topgan.
Timakovaning aniqlik kiritishicha, hukumatda mukofot jamg‘armasi bor. “Boshqacha aytganda, bosh vazir mukofot puli oladi, prezident esa — yo‘q. Vladimir Putin ham bosh vazir bo‘lgan paytida ko‘proq maosh olgan”, — dedi Medvedevning matbuot kotibi.
Eslatib o‘tamiz, avvalroq Rossiya prezidenti Vladimir Putin daromadlari 2014-yilda undan oldingi yilga nisbatan ikki marta oshgani xabar berilgan edi. Kreml saytiga joylangan daromadlar to‘g‘risidagi deklaratsiyada aytilishicha, o‘tgan yil ichida prezident 7,654 million rubl ishlagan, 2013-yilda esa ushbu ko‘rsatkich 3,6 million rublga teng bo‘lgan.
Hukumat a’zolari tomonidan taqdim etilgan daromadlar to‘g‘risidagi deklaratsiyaga muvofiq, Rossiya bosh vaziri Dmitriy Medvedev 2014-yilda 8 million rubl ishlab topgan (2013-yilda — 4,2 million rubl).
Izoh (0)