Дмитрий Медведевнинг матбуот котиби Наталья Тимакова бош вазир ва президентнинг декларация қилинган даромадлари ўртасидаги фарқни тушунтириб берди, деб ёзади «РБК».
Унинг айтишича, Медведев 2014 йилда мукофот пуллари эвазига Владимир Путиндан кўпроқ пул ишлаб топган.
Тимакованинг аниқлик киритишича, ҳукуматда мукофот жамғармаси бор. «Бошқача айтганда, бош вазир мукофот пули олади, президент эса — йўқ. Владимир Путин ҳам бош вазир бўлган пайтида кўпроқ маош олган», — деди Медведевнинг матбуот котиби.
Эслатиб ўтамиз, аввалроқ Россия президенти Владимир Путин даромадлари 2014 йилда ундан олдинги йилга нисбатан икки марта ошгани хабар берилган эди. Кремль сайтига жойланган даромадлар тўғрисидаги декларацияда айтилишича, ўтган йил ичида президент 7,654 миллион рубль ишлаган, 2013 йилда эса ушбу кўрсаткич 3,6 миллион рублга тенг бўлган.
Ҳукумат аъзолари томонидан тақдим этилган даромадлар тўғрисидаги декларацияга мувофиқ, Россия бош вазири Дмитрий Медведев 2014 йилда 8 миллион рубль ишлаб топган (2013 йилда — 4,2 миллион рубль).
Изоҳ (0)