Yamanda ikki haftadan beri davom etayotgan janglar natijasida 1 mingdan ortiq odam, xususan, 200 nafar bola halok bo‘ldi, 15 ming kishi esa yaralandi. Bu haqda isyonchi xusiylar vakili Sharof Luqmon ma’lum qildi, deya xabar bermoda “TASS”.
Sanadagi matbuot anjumanida chiqish qilarkan, Luqmon Saudiya Arabistonining Yaman bo‘ylab berayotgan aviazarbalarini “vahshiy tajovuz” deb atadi va Yamanni “tajovuzkorlar uchun qabriston”ga aylantirishga va’da berdi.
Luqmonning so‘zlariga ko‘ra, Yaman xalqini mag‘lub etish oson emas. “Biz, ertami-kechmi, o‘zimiz zarur deb hisoblagan yo‘l bilan baribir qasos olamiz”, - deya Luqmonning so‘zlaridan iqtibos keltirmoqda Eronning Press-TV telekanali.
Saudiya harbiy-havo kuchlari Bahrayn, Qatar, Kuvayt va Birlashgan Arab Amirliklari aviatsiyasi ko‘magida 26-martga o‘tar kechasi Yamanning aksariyat hududi ustidan nazorat o‘rnatgan isyonchi shialarning “Ansorulloh” harakatiga qarshi “Qat’iyat bo‘roni” operatsiyasini boshlagan edi.
“Arab koalitsiyasi”ga, shuningdek, Misr, Iordaniya, Marokash, Pokiston va Sudan ham qo‘shilgan.
Ayni vaqtda, Yamandagi gumanitar vaziyat keskin yomonlashgan. Jahon Sog‘liqni saqlash tashkilotining 6-aprel holati bo‘yicha ma’lumotlariga ko‘ra, jangovar harakatlar natijasida 643 kishi halok bo‘lgan, 2226 kishi jarohatlangan.
Qurolli nizo 15,9 million kishiga dahl qildi. 254 mingdan ortiq yamanlik mamlakatni tark etdi. Bundan tashqari, mamlakat ichkarisida o‘z yashash joyini tashlab chiqishga majbur bo‘lganlar soni 334 mingdan oshdi.
Izoh (0)