Яманда икки ҳафтадан бери давом этаётган жанглар натижасида 1 мингдан ортиқ одам, хусусан, 200 нафар бола ҳалок бўлди, 15 минг киши эса яраланди. Бу ҳақда исёнчи хусийлар вакили Шароф Луқмон маълум қилди, дея хабар бермода ТАСС.
Санадаги матбуот анжуманида чиқиш қиларкан, Луқмон Саудия Арабистонининг Яман бўйлаб бераётган авиазарбаларини «ваҳший тажовуз» деб атади ва Яманни «тажовузкорлар учун қабристон»га айлантиришга ваъда берди.
Луқмоннинг сўзларига кўра, Яман халқини мағлуб этиш осон эмас. «Биз, эртами-кечми, ўзимиз зарур деб ҳисоблаган йўл билан барибир қасос оламиз», - дея Луқмоннинг сўзларидан иқтибос келтирмоқда Эроннинг Пресс-ТВ телеканали.
Саудия ҳарбий-ҳаво кучлари Баҳрайн, Қатар, Кувайт ва Бирлашган Араб Амирликлари авиацияси кўмагида 26 мартга ўтар кечаси Яманнинг аксарият ҳудуди устидан назорат ўрнатган исёнчи шиаларнинг «Ансоруллоҳ» ҳаракатига қарши «Қатъият бўрони» операциясини бошлаган эди.
«Араб коалицияси»га, шунингдек, Миср, Иордания, Марокаш, Покистон ва Судан ҳам қўшилган.
Айни вақтда, Ямандаги гуманитар вазият кескин ёмонлашган. Жаҳон Соғлиқни сақлаш ташкилотининг 6 апрель ҳолати бўйича маълумотларига кўра, жанговар ҳаракатлар натижасида 643 киши ҳалок бўлган, 2226 киши жароҳатланган.
Қуролли низо 15,9 миллион кишига даҳл қилди. 254 мингдан ортиқ яманлик мамлакатни тарк этди. Бундан ташқари, мамлакат ичкарисида ўз яшаш жойини ташлаб чиқишга мажбур бўлганлар сони 334 мингдан ошди.
Изоҳ (0)