Hindistonda bir yilda bolalar o‘rtasida 1,3 millionta o‘lim sodir bo‘ldi

2013-yilda Hindistonda besh yoshgacha bo‘lgan 1,3 million nafar bola vafot etgan. Bu haqda xalqaro olimlar guruhiga tayanib, British Medical Journal xabar berdi.

Hindiston besh yoshgacha bo‘lgan bolalar o‘rtasida o‘lim soni eng yuqori bo‘lgan beshta davlatdan biri hisoblanadi. Qolgan to‘rtta davlat — Nigeriya, Pokiston, Xitoy va Kongo Demokratik Respublikasi.

2013-yilda jami 6,3 million bola vafot etgan. Olimlar ma’lumotlariga ko‘ra, ularning 3,257 millioni (51,8%) yuqumli kasalliklar tufayli nobud bo‘lgan, 2,761 millioni (44%) esa emadigan yoshda vafot etgan.

Shifokorlar bolalar o‘rtasidagi o‘limga uchta omilni asosiy sabab qilib keltirmoqda. Bular — vaqtidan ilgari tug‘ish asoratlari; zotiljam (pnevmoniya), qizamiq va ich ketish (diareya) bilan bog‘liq kasalliklar; tug‘ish vaqtidagi qiyinchiliklar.

Olimlarning ta’kidlashicha, 2000-yil bilan taqqoslaganda bolalar o‘limi darajasi olti milliontaga kamaygan. “Agar shu yo‘nalish saqlab qolinsa, 2030-yilga kelib, bolalar o‘rtasidagi o‘lim 4,4 million kishiga teng bo‘ladi”, — deyiladi maqolada.