Ҳиндистонда бир йилда болалар ўртасида 1,3 миллионта ўлим содир бўлди

2013 йилда Ҳиндистонда беш ёшгача бўлган 1,3 миллион нафар бола вафот этган. Бу ҳақда халқаро олимлар гуруҳига таяниб, British Medical Journal хабар берди.

Ҳиндистон беш ёшгача бўлган болалар ўртасида ўлим сони энг юқори бўлган бешта давлатдан бири ҳисобланади. Қолган тўртта давлат — Нигерия, Покистон, Хитой ва Конго Демократик Республикаси.

2013 йилда жами 6,3 миллион бола вафот этган. Олимлар маълумотларига кўра, уларнинг 3,257 миллиони (51,8%) юқумли касалликлар туфайли нобуд бўлган, 2,761 миллиони (44%) эса эмадиган ёшда вафот этган.

Шифокорлар болалар ўртасидаги ўлимга учта омилни асосий сабаб қилиб келтирмоқда. Булар — вақтидан илгари туғиш асоратлари; зотилжам (пневмония), қизамиқ ва ич кетиш (диарея) билан боғлиқ касалликлар; туғиш вақтидаги қийинчиликлар.

Олимларнинг таъкидлашича, 2000 йил билан таққослаганда болалар ўлими даражаси олти миллионтага камайган. «Агар шу йўналиш сақлаб қолинса, 2030 йилга келиб, болалар ўртасидаги ўлим 4,4 миллион кишига тенг бўлади», — дейилади мақолада.