Avstraliyaning Tinch okeani sohilidan taxminan 20 kilometr uzoqlikda joylashgan Brisben shahriga bo‘ron yopirildi, deya xabar bermoqda Sky News Australia. U so‘nggi 30 yil ichidagi eng kuchli bo‘ron deb atalmoqda.
Ofat shaharga 27-noyabr kuni 16:00 atrofida (Toshkent vaqti bilan 11:00 da) yog‘ildi, natijada 39 kishi zarar ko‘rdi.
Soniyasiga 39 metr tezlik bilan esgan shiddatli shamol ko‘plab daraxt va elektr uzatish tarmoqlarini qulatdi. Shahardagi 90 mingga yaqin uy chiroqsiz qoldi. Bo‘ron uylarning tomini uchirib ketdi, baland binolardagi oynalarni sindirdi, shuningdek Brisbendagi aeroportlardan birida to‘rtta yengil motorli samolyotni ag‘darib yubordi.
Bo‘ronga tennis koptogi hajmidagi do‘l hamrohlik qildi, u tufayli mahalliy parlament o‘z ishini to‘xtatib turishga majbur bo‘ldi. Xabar berilishicha, bundan ikki hafta avval “Katta yigirmatalik” yetakchilari uchrashgan anjumanlar zali ham zarar ko‘rdi.
Yarim soat ichida deyarli bir oylik yog‘in me’yori tushdi, natijada ko‘chalardagi mashinalar suv ostida qoldi.
Meteorologlar ma’lum qilishicha, bo‘ron qit’a shimoliga yo‘naldi.
Izoh (0)