Австралиянинг Тинч океани соҳилидан тахминан 20 километр узоқликда жойлашган Брисбен шаҳрига бўрон ёпирилди, дея хабар бермоқда Sky News Australia. У сўнгги 30 йил ичидаги энг кучли бўрон деб аталмоқда.
Офат шаҳарга 27 ноябрь куни 16:00 атрофида (Тошкент вақти билан 11:00 да) ёғилди, натижада 39 киши зарар кўрди.
Сониясига 39 метр тезлик билан эсган шиддатли шамол кўплаб дарахт ва электр узатиш тармоқларини қулатди. Шаҳардаги 90 мингга яқин уй чироқсиз қолди. Бўрон уйларнинг томини учириб кетди, баланд бинолардаги ойналарни синдирди, шунингдек Брисбендаги аэропортлардан бирида тўртта енгил моторли самолётни ағдариб юборди.
Бўронга теннис коптоги ҳажмидаги дўл ҳамроҳлик қилди, у туфайли маҳаллий парламент ўз ишини тўхтатиб туришга мажбур бўлди. Хабар берилишича, бундан икки ҳафта аввал «Катта йигирматалик» етакчилари учрашган анжуманлар зали ҳам зарар кўрди.
Ярим соат ичида деярли бир ойлик ёғин меъёри тушди, натижада кўчалардаги машиналар сув остида қолди.
Метеорологлар маълум қилишича, бўрон қитъа шимолига йўналди.
Изоҳ (0)