O‘tgan hafta “Paxtakor” faxriylari safida Tbilisining “Dinamo” klubiga qarshi o‘rtoqlik uchrashuvida maydonga tushgan O‘zbekiston milliy terma jamoasi bosh murabbiyi Mirjalol Qosimov o‘z taassurotlari bilan o‘rtoqlashdi, deb xabar beradi “Uff.uz”.
Mirjalol Qosimov o‘yinning qiziqarli o‘tganini qayd etdi: “Juda yaxshi uchrashuv bo‘ldi, yoshlik damlarini yodga oldik.
Gruziyadan Aleksandr Chivadze, Vladimir Gutsayev, Otar Gabeliya kabi futbol afsonalari keldi. Ular bilan qiziqarli suhbat bo‘lib o‘tdi. Yana ‘Alaniya’ safida men bilan birga to‘p surgan Georgiy Demetradze va Mixail Kavelashvili ham keldi. Sobiq jamoadoshlarim bilan Vladikavkazda o‘tkazgan davrlarimizni esga oldik. Hammasi juda yaxshi o‘tdi. Bunday bahslar judayam kerak. Faxriylar futboliga e’tibor berilishi yoqimli holat.
Avvalo tashkilotchilik uchun ‘Paxtakor’ klubi rahbariyatiga minnatdorchilik bildirmoqchiman. Jamoa rahbarlari o‘rtoqlik o‘yini uchun juda yaxshi sharoitlarni yaratib berdi”.
O‘zbekiston milliy terma jamoasi bosh murabbiyi mazkur o‘yindagi o‘zbek futbolining yaqin o‘tmishdagi yulduzlari sport formalari haqida ham fikr bildirib o‘tdi: “Tbilisiliklarga qarshi kechgan bahsda barchamizning faqat ustimizdagi formamiz yaxshi edi (kuladi). Jiddiy oladigan bo‘lsak, futbolchilik faoliyatimizni yakunlaganimizga ancha bo‘ldi, jismoniy holatimiz ham avvalgidek emas. Shunday ekan, sport formamizning ham ancha pasayishi tabiiy holat. Ammo bunday o‘yinlardan maqsad butkul boshqacha bo‘ladi. Biz imkon qadar futbol o‘ynadik, yoshlik davrlarini yodga oldik. Jamoadoshlarimning barchasi yaxshi o‘ynashdi, menga yoqdi. Umid qilamanki, bunday uchrashuvlar ko‘proq o‘tkazib turiladi”.
Shuningdek, Mirjalol Qosimov gruziyalik mehmonlar uchun tashkil etilgan tadbirlar haqida ham aytar ekan, ular O‘zbekistonga kelishi bilanoq 1979-yilda vafot etgan “Paxtakor” futbolchilari dafn etilgan qabristonni ziyorat qilish istagini bildirganini qayd etdi.
“Hammamiz birga qabristonga bordik, o‘tganlarni yodga oldik. Bundan ellik yil oldin Toshkentda bo‘lib o‘tgan o‘yinda ‘Torpedo’ni mag‘lub etib, chempionlikni qo‘lga kiritgan ‘Dinamo’ futbolchilari ‘paxtakorchilar’ni yaxshi tanir edi. Ayniqsa, Aleksandr Chivadze ular haqida ko‘p voqealarni aytib berdi.
‘Paxtakor’ afsonalari haqida xotiralarni eshitish juda yoqimli. Chivadzening aytishicha, Mixail An avvaldan samolyotda uchishni yoqtirmagan ekan. Parvoz vaqtida samolyot atmosferadagi girdobli harakat tufayli titrab ketsa, asabiylashar ekan. Shuningdek, Vladimir Fyodorov haqida ham ko‘p gaplar aytildi. Xotira — yaxshi narsa. Bunday uchrashuvlardan o‘zingga ko‘p narsa olasan”.
Murabbiy gruziyaliklar mehmonlarga ‘Bunyodkor’ stadioni yoqib qolganini alohida ta’kidladi. “‘Alaniya’da birga to‘p surgan do‘stlarim yangi o‘yingohga qoyil qoldi. ‘Bizning Gruziyada hali bunday stadion qurilganicha yo‘q. Sizlarga havas qilsa arziydi’, — dedi ular. Bunday gaplar biz uchun ham yoqimli, albatta. O‘z navbatida ular ham bizni mehmonga taklif qildi. Nasib qilsa, Kutaisida javob uchrashuvi o‘tkaziladi”.
Eslatib o‘tamiz, 22-noyabr kuni “Paxtakor” faxriylarining “Dinamo” (Tbilisi) klubiga qarshi o‘tkazgan o‘rtoqlik uchrashuvida durang natija qayd etilgan edi.
Izoh (0)