Ўтган ҳафта «Пахтакор» фахрийлари сафида Тбилисининг «Динамо» клубига қарши ўртоқлик учрашувида майдонга тушган Ўзбекистон миллий терма жамоаси бош мураббийи Миржалол Қосимов ўз таассуротлари билан ўртоқлашди, деб хабар беради «Uff.uz».
Миржалол Қосимов ўйиннинг қизиқарли ўтганини қайд этди: «Жуда яхши учрашув бўлди, ёшлик дамларини ёдга олдик.
Грузиядан Александр Чивадзе, Владимир Гуцаев, Отар Габелия каби футбол афсоналари келди. Улар билан қизиқарли суҳбат бўлиб ўтди. Яна ‘Алания’ сафида мен билан бирга тўп сурган Георгий Деметрадзе ва Михаил Кавелашвили ҳам келди. Собиқ жамоадошларим билан Владикавказда ўтказган даврларимизни эсга олдик. Ҳаммаси жуда яхши ўтди. Бундай баҳслар жудаям керак. Фахрийлар футболига эътибор берилиши ёқимли ҳолат.
Аввало ташкилотчилик учун ‘Пахтакор’ клуби раҳбариятига миннатдорчилик билдирмоқчиман. Жамоа раҳбарлари ўртоқлик ўйини учун жуда яхши шароитларни яратиб берди».
Ўзбекистон миллий терма жамоаси бош мураббийи мазкур ўйиндаги ўзбек футболининг яқин ўтмишдаги юлдузлари спорт формалари ҳақида ҳам фикр билдириб ўтди: «Тбилисиликларга қарши кечган баҳсда барчамизнинг фақат устимиздаги формамиз яхши эди (кулади). Жиддий оладиган бўлсак, футболчилик фаолиятимизни якунлаганимизга анча бўлди, жисмоний ҳолатимиз ҳам аввалгидек эмас. Шундай экан, спорт формамизнинг ҳам анча пасайиши табиий ҳолат. Аммо бундай ўйинлардан мақсад буткул бошқача бўлади. Биз имкон қадар футбол ўйнадик, ёшлик даврларини ёдга олдик. Жамоадошларимнинг барчаси яхши ўйнашди, менга ёқди. Умид қиламанки, бундай учрашувлар кўпроқ ўтказиб турилади».
Шунингдек, Миржалол Қосимов грузиялик меҳмонлар учун ташкил этилган тадбирлар ҳақида ҳам айтар экан, улар Ўзбекистонга келиши биланоқ 1979 йилда вафот этган «Пахтакор» футболчилари дафн этилган қабристонни зиёрат қилиш истагини билдирганини қайд этди.
«Ҳаммамиз бирга қабристонга бордик, ўтганларни ёдга олдик. Бундан эллик йил олдин Тошкентда бўлиб ўтган ўйинда ‘Торпедо’ни мағлуб этиб, чемпионликни қўлга киритган ‘Динамо’ футболчилари ‘пахтакорчилар’ни яхши танир эди. Айниқса, Александр Чивадзе улар ҳақида кўп воқеаларни айтиб берди.
‘Пахтакор’ афсоналари ҳақида хотираларни эшитиш жуда ёқимли. Чивадзенинг айтишича, Михаил Ан аввалдан самолётда учишни ёқтирмаган экан. Парвоз вақтида самолёт атмосферадаги гирдобли ҳаракат туфайли титраб кетса, асабийлашар экан. Шунингдек, Владимир Фёдоров ҳақида ҳам кўп гаплар айтилди. Хотира — яхши нарса. Бундай учрашувлардан ўзингга кўп нарса оласан».
Мураббий грузияликлар меҳмонларга ‘Бунёдкор’ стадиони ёқиб қолганини алоҳида таъкидлади. «‘Алания’да бирга тўп сурган дўстларим янги ўйингоҳга қойил қолди. ‘Бизнинг Грузияда ҳали бундай стадион қурилганича йўқ. Сизларга ҳавас қилса арзийди’, — деди улар. Бундай гаплар биз учун ҳам ёқимли, албатта. Ўз навбатида улар ҳам бизни меҳмонга таклиф қилди. Насиб қилса, Кутаисида жавоб учрашуви ўтказилади».
Эслатиб ўтамиз, 22 ноябрь куни «Пахтакор» фахрийларининг «Динамо» (Тбилиси) клубига қарши ўтказган ўртоқлик учрашувида дуранг натижа қайд этилган эди.
Изоҳ (0)