Samarqandda norasmiy protestantlik firqasi tarafdorlari sudlandi

Yaqinda jinoiy ishlar bo‘yicha Samarqand shahar sudining ochiq sud majlisi bo‘lib o‘tdi. Bu haqda “Samarkandskiy Vestnik” gazetasi xabar bermoqda.

Unda O‘zbekiston Respublikasi Ma’muriy javobgarlik kodeksining 184²- (“Diniy mazmundagi materiallarni qonunga xilof ravishda tayyorlash, saqlash, olib kirish, tarqatish”), 240-(“Diniy tashkilotlar to‘g‘risidagi qonun hujjatlarini buzish”) va 241-moddalari (“Diniy ta’limotdan saboq berish tartibini buzish”)da nazarda tutilgan qonunbuzarliklarni amalga oshirishda gumon qilingan bir guruh shaxslarga nisbatan yig‘ilgan hujjatlar bo‘yicha ma’muriy ish ko‘rib chiqildi.

Sud tergovi jarayonida Samarqand shahrida yashovchi 1965-yilda tug‘ilgan Fiala Konstantinovna Kim, 1958-yilda tug‘ilgan Ella Mixaylovna Soy, 1988-yilda tug‘ilgan Lyubov Stepanovna Fomina, 1872-yilda tug‘ilgan Yelena Vladimirovna Pavlenko, 1970-yilda tug‘ilgan Fotima Davronovna Kim, 1981-yilda tug‘ilgan Galina Alekseyevna Sirotina O‘zbekiston Respublikasining amaldagi qonunchiligini buzgan holda norasmiy protestantlik firqasi mafkurasini o‘qitish va o‘rganish maqsadida 12 kishi bo‘lib to‘planishi ma’lum bo‘ldi.

Ishni ko‘rib chiqqach, sud F. K. Kim, E. M. Soy, L. S. Fomina va Ye. V. Pavlenkoga nisbatan O‘zbekiston Respublikasi Ma’muriy javobgarlik kodeksining 184²-moddasiga muvofiq, eng kam oylik ish haqining yigirma baravari miqdorida jarima; F. D. Kim va G. A. Sirotinaga esa O‘zbekiston Respublikasi Ma’muriy javobgarlik kodeksining 34-, 184²-, 240- va 241-moddalariga muvofiq, eng kam oylik ish haqining 155 baravari miqdorida jarima belgiladi.