Яқинда жиноий ишлар бўйича Самарқанд шаҳар судининг очиқ суд мажлиси бўлиб ўтди. Бу ҳақда «Самаркандский Вестник» газетаси хабар бермоқда.
Унда Ўзбекистон Республикаси Маъмурий жавобгарлик кодексининг 184²- («Диний мазмундаги материалларни қонунга хилоф равишда тайёрлаш, сақлаш, олиб кириш, тарқатиш»), 240-(«Диний ташкилотлар тўғрисидаги қонун ҳужжатларини бузиш») ва 241-моддалари («Диний таълимотдан сабоқ бериш тартибини бузиш»)да назарда тутилган қонунбузарликларни амалга оширишда гумон қилинган бир гуруҳ шахсларга нисбатан йиғилган ҳужжатлар бўйича маъмурий иш кўриб чиқилди.
Суд тергови жараёнида Самарқанд шаҳрида яшовчи 1965 йилда туғилган Фиала Константиновна Ким, 1958 йилда туғилган Элла Михайловна Цой, 1988 йилда туғилган Любовь Степановна Фомина, 1872 йилда туғилган Елена Владимировна Павленко, 1970 йилда туғилган Фотима Давроновна Ким, 1981 йилда туғилган Галина Алексеевна Сиротина Ўзбекистон Республикасининг амалдаги қонунчилигини бузган ҳолда норасмий протестантлик фирқаси мафкурасини ўқитиш ва ўрганиш мақсадида 12 киши бўлиб тўпланиши маълум бўлди.
Ишни кўриб чиққач, суд Ф. К. Ким, Э. М. Цой, Л. С. Фомина ва Е. V. Павленкога нисбатан Ўзбекистон Республикаси Маъмурий жавобгарлик кодексининг 184²-моддасига мувофиқ, энг кам ойлик иш ҳақининг йигирма баравари миқдорида жарима; Ф. Д. Ким ва Г. А. Сиротинага эса Ўзбекистон Республикаси Маъмурий жавобгарлик кодексининг 34-, 184²-, 240- ва 241-моддаларига мувофиқ, энг кам ойлик иш ҳақининг 155 баравари миқдорида жарима белгилади.
Изоҳ (0)