Toshkentdagi nufuzli oliygoh talabasi o‘qituvchisini aldab olgan 12 600 dollarga “Neksiya” xarid qildi

2010-yilda poytaxtning nufuzli oliygohlaridan biriga o‘qishga kirgan talaba birinchi bos­qichni tamomlab, ikkinchi kursga o‘tganda nafs vasvasasiga berilib qoldi. Endi uning xayolini dars qilish emas, aksincha, boylik va yengil daromad topish egalladi. Oxir-oqibat huquq­shunos bo‘lishni orzu qilgan yigit to‘g‘ri yo‘ldan adashib, egri yo‘lga qadam qo‘ydi, deb xabar bermoqda O‘zbekiston Respublikasi Bosh prokuraturasining “Huquq” nashri.

Talaba dastlabki “o‘lja” sifatida institutda o‘ziga dars bergan o‘qituvchisiga yolg‘on va’dalar berib, avtosalon orqali ikki dona Spark rusumli avtomashina olib berishi mumkinligiga ishontirdi. 2012-yil 26-iyun kuni esa ayolning ishonchini sui­iste’mol qilgan holda shart­nomani bahona qilib, avtomashinalar uchun oldindan to‘lanadigan 85 foiz summani to‘lash kerakligini ma’lum qildi. O‘qituvchi uning takliflariga rozi bo‘ldi va qulay fursatni boy bermaslik maqsadida mashinalar uchun kelishilgan 12 600 AQSh dollarini oldindan berdi.

Oradan ikki kun o‘tib, talaba bu pulga tanishidan 10 700 AQSh dollari evaziga o‘zi uchun “Neksiya” avtomashinasi sotib oldi. O‘qituvchi esa mashinasini qachon olishini talabasidan so‘ray boshladi. Firibgar “avtosalonda navbatingiz kelgan kuni mashinangizning kaliti va tegishli hujjatlarini qo‘lingizga topshiraman”, deb uning qo‘ynini puch yong‘oqqa to‘ldirdi. Talabasining gaplaridan ko‘ngli to‘lgandek bo‘lgan ayol uning gaplariga ishonib qolaverdi.

Mo‘may pul moydek yoqib tushgan firibgar talaba endi ikkinchi jinoiy ish rejasini tuzadi. U bu safar tanishining ukasini ishga joylashtirishga “harakat” boshlaydi. Firibgar ishni jiddiylikka yo‘yib, tanishi bilan uchrashuv belgilaydi. Uchrashuvga ishga kirishi kerak bo‘lgan yigit ham keladi. Firibgar o‘zini ins­titutda talaba hamda huquqni muhofaza qiluvchi organlarning birida xodim bo‘lib ishlashini aytib, ularga o‘zi haqida yolg‘on ma’lumotlarni beradi. Suhbat davomida u yaqinda uch-to‘rt kishini organ sohasiga ishga joylashtirganini va oldi-berdidagi narx-navodan to‘liq xabardor ekanini aytib, organ sohalariga ishga kirish uchun “baquvvat” tanish va “otning kallasidek” pul kerakligini ham qistirib o‘tadi.

Firibgar talaba ishni boshlash uchun dastlab 10 ming AQSh dollari, ish bitgandan so‘ng yana 20 ming dollar — hammasi bo‘lib 30 ming AQSh dollari kerak bo‘lishini aytadi.

Oradan uch kun o‘tib, so‘ralgan pul firibgar talabaga keltirib beriladi. Oradan haftalar, oylar o‘tib ketsa-da, talabadan darak bo‘lmaydi. Kunlarning birida firibgar ishonchni yo‘qotmaslik maqsadida “o‘ljasi”ga qo‘ng‘iroq qiladi va pulning qolgan qismini so‘raydi. Aldov qurboniga aylanib qolganini sezgan shaxs huquqni muhofaza qiluvchi organga murojaat qiladi. Firibgar talaba esa jinoyat ustida qo‘lga olinadi.

“Hojatbaror” talabaning ustidan kelib tushgan boshqa shikoyatlar asosida ham surishtiruv va tergov ishlari boshlab yuborildi. Firibgar jinoyat ishlari bo‘yicha Hamza tuman sudi tomonidan Jinoyat kodeksining tegishli moddalariga binoan aybdor deb topilib, unga besh yil ozodlikdan mahrum etish jazosi belgilandi.