“Toshkent-O‘sh” avtomobil yo‘lining Qamchiq dovoni qismida 2014—2015-yillar qish mavsumiga qizg‘in tayyorgarlik ko‘rilmoqda. Bu haqda Favqulodda vaziyatlar vazirligi matbuot xizmati xabar berdi.
Qamchiq dovoni orqali o‘tadigan “Guliston - Bo‘ka - Angren - Qo‘qon - Andijon - O‘sh” avtomobil yo‘li respublikamizni xorij mamlakatlari bilan bog‘labgina qolmay, balki muhim siyosiy-iqtisodiy ahamiyatga ega hamdir.
“Toshkent – O‘sh” yo‘lining Qamchiq dovoni qismi u qadar baland bo‘lmasa-da, Markaziy Osiyo davlatlari ichida eng uzunlaridan biri sanaladi. Bu yo‘ldan Farg‘ona vodiysining uchta viloyatidan tashqari, xorijdan kelgan yo‘lovchi-sayyohlarning ham qadami uzilmaydi. Qolaversa, qo‘shni Tojikiston va Qirg‘iziston Respublikalari aholisi, balki xitoylik mehmonlar uchun ham eng qisqa va qulay bo‘lgan tog‘ yo‘li hisoblanadi. Dovon yo‘lining qish-u yozin serqatnovligi ham shundan.
O‘zbekiston Respublikasi Hukumatining topshirig‘iga asosan, Favqulodda vaziyatlar, Ichki ishlar vazirliklari, “O‘zavtoyo‘l” kompaniyasi va Respublika yo‘l jamg‘armasi bilan birgalikda 2014—2015-yillar qishki mavsumda A-373 “Toshkent-O‘sh” avtomobil yo‘lining Qamchiq dovonining barqaror faoliyat ko‘rsatishini, dovon orqali avtotransport vositalari va yo‘lovchilarning xavfsiz hamda uzluksiz harakatlarini ta’minlash maqsadida, bir qator samarali ishlar amalga oshirilmoqda.
Qishki mavsumga jalb qilinishga rejalashtirilgan barcha texnika va mexanizmlar shay holatga keltirilmoqda va yo‘l bo‘limlariga biriktirildi.
Rejada belgilangan avtoyo‘l yoqasidagi avtomobillar to‘xtab turishiga mo‘ljallangan 13 ta falokatli holatlarda chiqish yo‘llari va 7 ta vaqtincha to‘xtash maydonchalari tozalanib, ularning holati doimiy nazoratga olingan.
Shuningdek, “Qamchiqavtoyo‘l” IYFKning bergan ma’lumotiga ko‘ra avtomobil yo‘lida kechayu kunduz xizmat qilayotgan ishchilar uchun200 komplekt issiq kiyim, 400 juft oyoq kiyim va 450 juft qo‘lqop zaxirasi yaratilgan.
Shu bilan bir qatorda, “VISATA GROUP” mas’uliyati cheklangan jamiyat tomonidan qor uyumlari to‘planadigan joylarda o‘rnatilishi rejalashtirilgan 1710 ta qor ko‘chkisidan himoya qilish to‘siqlaridan 1000 dan ortig‘i o‘rnatildi.
Qamchiq dovonida og‘ir klimatik sharoitlarda qolib ketgan aholiga yordam ko‘rsatish va xavfsiz joylarga ko‘chirish, qor ko‘chkisi bilan bog‘liq favqulodda vaziyatlar sodir bo‘lganda yo‘lovchilarni qabul qilish maqsadida, Ohangaron tumanida 5 ta, Angren shahrida 5 ta va Pop tumani hududida 4 ta oshxonalarning faoliyati va qish mavsumiga tayyorgarlik ishlari o‘rganib chiqildi.
Toshkent va Namangan viloyati hokimliklari tomonidan Qamchiq dovonida faoliyat olib borayotgan 15 ta nazorat guruhlarining shaxsiy tarkibi uchun sharoitlar yaratish maqsadida, belgilangan me’yorlarga asosan oziq-ovqat mahsulotlari hamda elektr plita, idish-tovoq, yotoq uchun zarur bo‘lgan jihozlar bilan ta’minlash rejalashtirildi.
Mazkur tadbirlarni amalga oshirish maqsadida, joriy yilning 8—10-oktabr kunlari mutasaddi vazirlik va idoralar mutaxassislaridan iborat ishchi guruh o‘rganish ishlarini olib bordi.
Ishchi guruh tomonidan yuqorida ko‘rsatib o‘tilgan tadbirlar amalga oshirilishi uchun takliflar va me’yoriy hujjatlar loyihasi ishlab chiqilib, vazirlik rahbariyatiga taqdim etildi.
Izoh (0)