2010 йилда пойтахтнинг нуфузли олийгоҳларидан бирига ўқишга кирган талаба биринчи босқични тамомлаб, иккинчи курсга ўтганда нафс васвасасига берилиб қолди. Энди унинг хаёлини дарс қилиш эмас, аксинча, бойлик ва енгил даромад топиш эгаллади. Охир-оқибат ҳуқуқшунос бўлишни орзу қилган йигит тўғри йўлдан адашиб, эгри йўлга қадам қўйди, деб хабар бермоқда Ўзбекистон Республикаси Бош прокуратурасининг «Ҳуқуқ» нашри.
Талаба дастлабки «ўлжа» сифатида институтда ўзига дарс берган ўқитувчисига ёлғон ваъдалар бериб, автосалон орқали икки дона Spark русумли автомашина олиб бериши мумкинлигига ишонтирди. 2012 йил 26 июнь куни эса аёлнинг ишончини суиистеъмол қилган ҳолда шартномани баҳона қилиб, автомашиналар учун олдиндан тўланадиган 85 фоиз суммани тўлаш кераклигини маълум қилди. Ўқитувчи унинг таклифларига рози бўлди ва қулай фурсатни бой бермаслик мақсадида машиналар учун келишилган 12 600 АҚШ долларини олдиндан берди.
Орадан икки кун ўтиб, талаба бу пулга танишидан 10 700 АҚШ доллари эвазига ўзи учун «Нексия» автомашинаси сотиб олди. Ўқитувчи эса машинасини қачон олишини талабасидан сўрай бошлади. Фирибгар «автосалонда навбатингиз келган куни машинангизнинг калити ва тегишли ҳужжатларини қўлингизга топшираман», деб унинг қўйнини пуч ёнғоққа тўлдирди. Талабасининг гапларидан кўнгли тўлгандек бўлган аёл унинг гапларига ишониб қолаверди.
Мўмай пул мойдек ёқиб тушган фирибгар талаба энди иккинчи жиноий иш режасини тузади. У бу сафар танишининг укасини ишга жойлаштиришга «ҳаракат» бошлайди. Фирибгар ишни жиддийликка йўйиб, таниши билан учрашув белгилайди. Учрашувга ишга кириши керак бўлган йигит ҳам келади. Фирибгар ўзини институтда талаба ҳамда ҳуқуқни муҳофаза қилувчи органларнинг бирида ходим бўлиб ишлашини айтиб, уларга ўзи ҳақида ёлғон маълумотларни беради. Суҳбат давомида у яқинда уч-тўрт кишини орган соҳасига ишга жойлаштирганини ва олди-бердидаги нарх-наводан тўлиқ хабардор эканини айтиб, орган соҳаларига ишга кириш учун «бақувват» таниш ва «отнинг калласидек» пул кераклигини ҳам қистириб ўтади.
Фирибгар талаба ишни бошлаш учун дастлаб 10 минг АҚШ доллари, иш битгандан сўнг яна 20 минг доллар — ҳаммаси бўлиб 30 минг АҚШ доллари керак бўлишини айтади.
Орадан уч кун ўтиб, сўралган пул фирибгар талабага келтириб берилади. Орадан ҳафталар, ойлар ўтиб кетса-да, талабадан дарак бўлмайди. Кунларнинг бирида фирибгар ишончни йўқотмаслик мақсадида «ўлжаси»га қўнғироқ қилади ва пулнинг қолган қисмини сўрайди. Алдов қурбонига айланиб қолганини сезган шахс ҳуқуқни муҳофаза қилувчи органга мурожаат қилади. Фирибгар талаба эса жиноят устида қўлга олинади.
«Ҳожатбарор» талабанинг устидан келиб тушган бошқа шикоятлар асосида ҳам суриштирув ва тергов ишлари бошлаб юборилди. Фирибгар жиноят ишлари бўйича Ҳамза туман суди томонидан Жиноят кодексининг тегишли моддаларига биноан айбдор деб топилиб, унга беш йил озодликдан маҳрум этиш жазоси белгиланди.
Изоҳ (0)