Nyu-York hukumati qamoqxonada issiqdan vafot etgan mahbusning onasiga 2 mln dollar tovon to‘laydi

Nyu-York hukumati “Raykers-Aylend” qamoqxonasi mahbusining onasiga 2,25 million dollar tovon puli to‘lashga rozi bo‘ldi, deya xabar bermoqda  “TASS”.

Gap shundaki, Jerom Merdau ismli ushbu mahbus shu yilning fevralida o‘zi saqlanayotgan kameradagi harorat bir necha soatlar davomida 40 darajani tashkil etib turgani sababli nobud bo‘lgan edi.

Fevral boshida ko‘p qavatli uylardan birining tomida tunni o‘tkazgani tufayli 56 yoshli Amerika qurolli kuchlari faxriysi, ruhiy nosog‘lom Merdau hibsga olingan va “Raykers-Aylend”ning ruhiy kasal mahbuslarga mo‘ljallangan maxsus qismiga joylashtirilgan edi.

OAVlar xabariga ko‘ra, texnik nosozliklar tufayli turmadagi ba’zi kameralarda harorat bir necha soatlar davomida 40 darajadan tushmagan. Mahbuslarning ko‘pchiligi ventilyatsiya tuynuklarini ochgan, biroq Merdau bunday qilmadi va bir kishilik kamerasida vafot etdi. Qamoqxona xodimlari uning jasadini bir necha soatdan so‘nggina aniqlashdi, qoidalarga ko‘ra esa ular har 15 daqiqada mahbusning ahvolini tekshirib turishi kerak. Tibbiy ekspertiza Merdauning gipertermiyadan vafot etganini ko‘rsatdi.

Huquq himoyachilari bu ish bo‘yicha puxta tergov olib borilishini talab qildi. Ularning aytishicha, avvalo, Merdauni hibsga olish o‘rniga unga tibbiy yordam ko‘rsatilishi kerak edi.

Marhumning 75 yoshli onasi may oyida turma rahbariyatini mas’uliyatsizlikda va o‘g‘lining fuqarolik huquqlarini buzishda ayblab sudga murojaat qildi hamda 25 million dollar miqdorida tovon puli talab qildi.