Ukrainaning Yevroittifoq bilan erkin savdo hududi haqidagi bitimni tatbiq etish 2015-yil oxiriga qoldirildi, deya xabar bermoqda BBC YeIning savdo masalalari bo‘yicha komissari Karel de Gyuxt bayonotiga tayanib. 12-sentabr, juma kuni Yevroittifoq, Rossiya va Ukraina bunga kelishib olishgan.
Gyuxtning aytishicha, YeI Ukrainaning Yevropa bozorlariga eksport qilinadigan mahsulotlariga savdo imtiyozlarini taqdim etishda davom etadi. Biroq Ukrainaga yetkazilayotgan Yevropa mahsulotlarga avvalgidek boj solinadi.
“Biz bitimni amalga oshirishni keyingi yil oxiriga qoldirdik. Bu yuzaga kelishi mumkin bo‘lgan barcha muammolarni muhokama qilib olish uchun vaqt beradi”, — dedi Gyuxt.
Ukraina tashqi ishlar vazirligi uch tomonlama kelishuv “YeI bilan erkin savdo to‘g‘risidagi bitimni amalga oshirish va MDH davlatlari erkin savdo hududi to‘g‘risidagi shartnoma doirasida Rossiya bilan erkin savdo rejimining davom etishi o‘rtasidagi muvozanatni ta’minlashi”ni ta’kidladi.
O‘z navbatida Rossiya tomonidan muzokaralarda ishtirok etgan iqtisodiy taraqqiyot vaziri Aleksey Ulyukayev Bryusseldagi uchrashuvda vazirlar ancha qiyin masalalar yuzasidan fikr almashganini aytdi. “Tomonlar Rossiya bildirgan masalalarni hal etish uchun vaqt kerak bo‘lishi haqidagi fikrga qo‘shilganidan xursandman. Ukraina va YeI o‘rtasidagi kelishuv ijrosi 2015-yil 31-dekabrgacha qoldiriladi”, — dedi u.
Izoh (0)