Yaponiyaning butun milliy tarixida 100 yoshdan oshgan aholi soni rekord darajaga yetdi, deya xabar bermoqda “ITAR-TASS” mamlakat sog‘liqni saqlash, mehnat va farovonlik vazirligiga tayanib. Bugungi kunda ular 58,8 ming kishini tashkil etadi, bu o‘tgan yilgi ko‘rsatkichdan 4,4 mingtaga ko‘pdir.
Ma’lum bo‘lishicha, yuz yoshdan yuqori yaponiyaliklar soni ketma-ket 44 yildan buyon to‘xtovsiz o‘sib kelmoqda. Ularning 87 foizi ayollardir. Vazirlik har yili 15-sentabrda nishonlanadigan milliy bayram — Keksalarni hurmatlash kuni arafasida bunday ma’ruzani e’lon qiladi.
Yaponiyadagi eng keksa kishi — Misao Okava ismli ayol bo‘lib, u martda 116 yoshni qarshi oldi. U Ginnesning Rekordlar kitobiga kiritilgan Yer sayyorasidagi eng keksa fuqaro hamdir. Dunyodagi eng keksa erkak ham yaponiyalik — 1903-yilda tug‘ilgan Sakari Momoi.
Yaponiyada uzoq umr ko‘ruvchilarning rekord darajada ko‘payib borishi bilan birga, aholi soni qisqarib bormoqda — 2013-yilda u urushdan keyingi davr bo‘yicha eng yuqori sur’atlarda pasaygan. Mamlakat aholisi tarkibida 65 yoshdan yuqori kishilar ulushi 24,4 foizgacha o‘sgan, 15 yoshdan kichik bolalar hissasi esa 13 foizga tengdir.
Izoh (0)