Xitoy janubi-g‘arbidagi Sichuan va shimoli-g‘arbidagi Shensi provinsiyalarida jala quyishi oqibatida yuzaga kelgan suv toshqinidan 1,39 million kishi zarar ko‘rdi. 167 ming kishi evakuatsiya qilindi, deya xabar bermoqda “ITAR-TASS” “Sinxua” agentligiga tayanib.
Hukumat ma’lumotlariga ko‘ra, daryoda suv sathining ko‘tarilishi natijasida bir kishi halok bo‘lgan, yana ikki kishi bedarak yo‘qolgan deb e’lon qilindi. Suv toshqini keltirgan zarar 1,5 milliard yuan (245 million dollar)ga baholanmoqda.
Tabiiy ofat hududiga gumanitar yordam yo‘naltirildi.
Xabar berilishicha, Sichuandagi daryolar suv sathining keskin ko‘tarilishi katta maydondagi qishloq xo‘jalik ekinlarini suv ostida qoldirgan. Ofat natijasida avtoyo‘llar va aloqa liniyalariga zarar yetgan, qator tumanlarda elektr energiyasini uzatish izdan chiqqan.
Sinoptiklar prognoziga ko‘ra, provinsiyaning ko‘plab uyezdlarida yaqin kunlarda juda ko‘p yog‘ingarchilik kutilmoqda.
Izoh (0)