Украинанинг Евроиттифоқ билан эркин савдо ҳудуди ҳақидаги битимни татбиқ этиш 2015 йил охирига қолдирилди, дея хабар бермоқда BBC ЕИнинг савдо масалалари бўйича комиссари Карел де Гюхт баёнотига таяниб. 12 сентябрь, жума куни Евроиттифоқ, Россия ва Украина бунга келишиб олишган.
Гюхтнинг айтишича, ЕИ Украинанинг Европа бозорларига экспорт қилинадиган маҳсулотларига савдо имтиёзларини тақдим этишда давом этади. Бироқ Украинага етказилаётган Европа маҳсулотларга аввалгидек бож солинади.
«Биз битимни амалга оширишни кейинги йил охирига қолдирдик. Бу юзага келиши мумкин бўлган барча муаммоларни муҳокама қилиб олиш учун вақт беради», — деди Гюхт.
Украина ташқи ишлар вазирлиги уч томонлама келишув «ЕИ билан эркин савдо тўғрисидаги битимни амалга ошириш ва МДҲ давлатлари эркин савдо ҳудуди тўғрисидаги шартнома доирасида Россия билан эркин савдо режимининг давом этиши ўртасидаги мувозанатни таъминлаши»ни таъкидлади.
Ўз навбатида Россия томонидан музокараларда иштирок этган иқтисодий тараққиёт вазири Алексей Улюкаев Брюсселдаги учрашувда вазирлар анча қийин масалалар юзасидан фикр алмашганини айтди. «Томонлар Россия билдирган масалаларни ҳал этиш учун вақт керак бўлиши ҳақидаги фикрга қўшилганидан хурсандман. Украина ва ЕИ ўртасидаги келишув ижроси 2015 йил 31 декабргача қолдирилади», — деди у.
Изоҳ (0)