13-sentabr kuni Rossiya favqulodda vaziyatlar vazirligining gumanitar yordam ortilgan 100 ga yaqin yuk mashinalari Ukraina sharqidagi Luganskka yetib keldi, deya xabar bermoqda Euronews. Bir kun avval oziq-ovqat, issiq buyumlar, dizel generatorlari va boshqa yuklardan iborat avtokolonna chegarani kesib o‘tib, bojxona nazoratidan o‘tdi.
Rossiya tashqi ishlar vaziri Sergey Lavrov so‘zlariga ko‘ra, Moskva to‘rt oydan buyon urushlar ostida qolgan mintaqalardagi shaharlar aholisiga yordam yubormoqda.
Bu Rossiya jo‘natayotgan gumanitar yuklardan iborat ikkinchi kolonnadir. Birinchi gumanitar yordam kolonnasi Kiyevning noroziligiga sabab bo‘lgan va uning yetkazilishi “bostirib kirish” deb atalgan edi.
Ayni vaqtda Ukraina bosh vaziri Arseniy Yatsenyuk AQSh va Yevroittifoqni Donbassdagi vaziyatni tartibga solish bo‘yicha Rossiya bilan muzokaralarda ishtirok etishga chaqirdi.
Yevropa strategiyasi bo‘yicha Yalta konferensiyasida Yatsenyuk Yevroittifoqning Rossiyaga qarshi kiritayotgan sanksiyalaridan mamnunligini bildirdi. Rossiya prezidentini esa “Ukrainani mustaqil davlat sifatida yo‘q qilib, Sovet ittifoqini qayta tiklash”ga urinishda aybladi.
Izoh (0)