13 сентябрь куни Россия фавқулодда вазиятлар вазирлигининг гуманитар ёрдам ортилган 100 га яқин юк машиналари Украина шарқидаги Луганскка етиб келди, дея хабар бермоқда Euronews. Бир кун аввал озиқ-овқат, иссиқ буюмлар, дизель генераторлари ва бошқа юклардан иборат автоколонна чегарани кесиб ўтиб, божхона назоратидан ўтди.
Россия ташқи ишлар вазири Сергей Лавров сўзларига кўра, Москва тўрт ойдан буён урушлар остида қолган минтақалардаги шаҳарлар аҳолисига ёрдам юбормоқда.
Бу Россия жўнатаётган гуманитар юклардан иборат иккинчи колоннадир. Биринчи гуманитар ёрдам колоннаси Киевнинг норозилигига сабаб бўлган ва унинг етказилиши «бостириб кириш» деб аталган эди.
Айни вақтда Украина бош вазири Арсений Яценюк АҚШ ва Евроиттифоқни Донбассдаги вазиятни тартибга солиш бўйича Россия билан музокараларда иштирок этишга чақирди.
Европа стратегияси бўйича Ялта конференциясида Яценюк Евроиттифоқнинг Россияга қарши киритаётган санкцияларидан мамнунлигини билдирди. Россия президентини эса «Украинани мустақил давлат сифатида йўқ қилиб, Совет иттифоқини қайта тиклаш»га уринишда айблади.
Изоҳ (0)