Buyuk Britaniya hukumati 18-sentabrdagi referendumda Shotlandiya aholisi mustaqillikka qarshi chiqqan taqdirda, mamlakatga ko‘proq avtonomiya berishga tayyor. Bu haqda Buyuk Britaniya moliya vaziri Jorj Osbornga tayanib “ITAR-TASS” ma’lum qildi.
“Odamlar saylov oqibatlaridan xavotir olmasliklari kerak, — dedi vazir BBC telekanaliga bergan intervyusida. — Yaqin bir necha kun ichida siz Shotlandiyaga ko‘proq vakolat taqdim etuvchi harakatlar rejasiga guvoh bo‘lasiz”.
Uning so‘zlariga ko‘ra, gap soliq solish va ijtimoiy himoya sohalaridagi ko‘proq erkinliklar haqida bormoqda.
Osborn, shuningdek saylovchilar Shotlandiyaning ajralib chiqishini yoqlab ovoz bersa, bosh vazir Devid Kemeron iste’foga chiqishga majbur bo‘lishini taxmin qildi.
Eslatib o‘tamiz, 2014-yil 18-sentabrda shotlandiyaliklar umumxalq referendumining (muhim davlat masalasini hal qilish uchun u to‘g‘rida umumxalq fikrini olish) “Shotlandiya mustaqil davlat bo‘lishi kerak, deb o‘ylaysizmi?” savoliga javob berishi kerak bo‘ladi.
1707-yildan buyon Angliya bilan qonuniy tuzilgan ittifoqda bo‘lgan Shotlandiya 1997-yilda cheklangan avtonomiyaga ega bo‘lgan edi. 1999-yildan uning hududida o‘z parlamenti va ijro etuvchi hukumati faoliyat olib bormoqda. Biroq ularning vakolati asosan ta’lim, madaniyat, sog‘liqni saqlash, transport, atrof-muhit muhofazasi va shunga o‘xshash sohalar bilan chegaralangan. Shuningdek, Shotlandiya o‘z sud tizimiga ham ega.
Mutaxassislar Shotlandiya mustaqillikka erishsa, bu mamlakatdan yadro qurollarini olib chiqib ketishning o‘zigina Britaniya hukumatiga 2,5 milliarddan 3,5 milliard funt sterlinggacha (4,2—5,9 milliard dollar) tushishi mumkinligini aytmoqda.
Izoh (0)