Буюк Британия ҳукумати 18 сентябрдаги референдумда Шотландия аҳолиси мустақилликка қарши чиққан тақдирда, мамлакатга кўпроқ автономия беришга тайёр. Бу ҳақда Буюк Британия молия вазири Жорж Осборнга таяниб ИТАР-ТАСС маълум қилди.
«Одамлар сайлов оқибатларидан хавотир олмасликлари керак, — деди вазир BBC телеканалига берган интервьюсида. — Яқин бир неча кун ичида сиз Шотландияга кўпроқ ваколат тақдим этувчи ҳаракатлар режасига гувоҳ бўласиз».
Унинг сўзларига кўра, гап солиқ солиш ва ижтимоий ҳимоя соҳаларидаги кўпроқ эркинликлар ҳақида бормоқда.
Осборн, шунингдек сайловчилар Шотландиянинг ажралиб чиқишини ёқлаб овоз берса, бош вазир Дэвид Кэмерон истеъфога чиқишга мажбур бўлишини тахмин қилди.
Эслатиб ўтамиз, 2014 йил 18 сентябрда шотландияликлар умумхалқ референдумининг (муҳим давлат масаласини ҳал қилиш учун у тўғрида умумхалқ фикрини олиш) «Шотландия мустақил давлат бўлиши керак, деб ўйлайсизми?» саволига жавоб бериши керак бўлади.
1707 йилдан буён Англия билан қонуний тузилган иттифоқда бўлган Шотландия 1997 йилда чекланган автономияга эга бўлган эди. 1999 йилдан унинг ҳудудида ўз парламенти ва ижро этувчи ҳукумати фаолият олиб бормоқда. Бироқ уларнинг ваколати асосан таълим, маданият, соғлиқни сақлаш, транспорт, атроф-муҳит муҳофазаси ва шунга ўхшаш соҳалар билан чегараланган. Шунингдек, Шотландия ўз суд тизимига ҳам эга.
Мутахассислар Шотландия мустақилликка эришса, бу мамлакатдан ядро қуролларини олиб чиқиб кетишнинг ўзигина Британия ҳукуматига 2,5 миллиарддан 3,5 миллиард фунт стерлинггача (4,2—5,9 миллиард доллар) тушиши мумкинлигини айтмоқда.
Изоҳ (0)