Olimlar o‘ta yirik dinozavrni kashf qilib, uni XX asr boshidagi ulkan harbiy kemalar sharafiga Drednoutus (Dreadnoughtus schrani) deb atadi. Bu haqda Drexel xabar bermoqda.
Uning skeleti juda yaxshi saqlanganidan, paleontologlar uning tanasi og‘irligi va uzunligini osonlik bilan aniqlashga muvaffaq bo‘ldi: o‘lchamlari aniq bo‘lgan dinozavrlar ichida 26 metr uzunlik va 65 tonna og‘irlik bilan drednoutus eng kattasi bo‘ldi.
“Dreadnoughtus schrani haqiqiy gigant bo‘lgan. U o‘n ikkita Afrika fillari yoki yettita reks tirannozavrlari og‘irligiga teng bo‘lgan. Bundan tashqari, skeletning holati u vafot etgan paytda hali to‘liq voyaga yetmaganini ko‘rsatadi”, — deya ta’kidladi kashfiyotning yetakchi olimi professor Kennet Lakovara.
Dinozavrning qoldiqlari kavlab olish ishlari 2005—2009-yillar davomida Argentinadagi Chubut tumanida olib borildi.
“Bunday hajmdagi dinozavr hech kimdan qo‘rqmagan. Bu menga XX asr boshidagi zirhli va mustahkam kemalarni eslatdi. Dreadnoughtus — “hech nimadan qo‘rqmaslik” deganidir”, — deya qayd etdi Lakovara. Ismdagi qo‘shimcha schrani esa tadqiqotga homiylik qilgan tadbirkor Adam Shren nomiga qo‘yilgan.
Drednoutus taxminan 77 million yil avval Janubiy Amerika janubidagi mo‘tadil o‘rmonlarda yashagan. Dinozavr uzun bo‘yni yordamida o‘z atrofidagi o‘simliklarni yegan holda deyarli butun kunni bir joyda o‘tkazgan.
Izoh (0)