Britaniyalik mexanik Kolin Meyrik Ice Bucket Challenge (“Bir chelak muzdek suv sinovi”) xayriya aksiyasiga o‘zgartirish kiritishga qaror qildi, deya xabar bermoqda Mirror. U o‘z hamkasblaridan ustidan 30 litr mashina moyi quyishni so‘radi va bu aksiyani Oil Bucket Challenge (“Bir chelak yog‘ sinovi”) deb atadi.
46 yoshli Kolin Meyrik o‘z videoroligidan tushgan mablag‘ni saratonga qarshi kurash bo‘yicha jamg‘armaga o‘tkazishga va’da berdi. Bu bilan u ushbu kasallikdan vafot etgan onasi xotirasini sharaflamoqchi bo‘ldi.
Video kutilmaganda katta muvaffaqiyatga erishdi: u internetga joylashtirilganidan bir necha soat o‘tib, mexanik hisobiga uning harakatidan zavqlangan YouTube foydalanuvchilaridan ming funtdan ortiq mablag‘ kelib tushdi.
ALS Ice Bucket Challenge aksiyasi tashkilotchilarining aytishicha, ayni paytda ular 100 million dollarga yaqin pul to‘plagan va ularni asab tizimining kamyob kasalliklari bilan kurashishga yo‘naltirgan.
Izoh (0)